La primera vegada qu’oyí falar de Rosa foi con ocasión de la campaña publicitaria que llanzó siendo conseyera socialista de turismu del gobiernu vascu d’Ardanza col PNV –ye llamativa la facilidá que’l PSOE tien eshibío dende antiguu pa gobernar con socios antitéticos, baste recordar la so asociación con Primo de Rivera- y que dicía daqué asina como “Euskadi, ven y cuéntalo”. Afortunadamente pa ella, al entamu los noventa internet y les redes nun taben como anguaño y eso salvóla d’una carnicería de memes, anque a Mingote dio-y pa una de les sos portaes maxistrales n’ABC.
Al final d’esi periodu, el secretariu xeneral socialista nel País Vascu Nicolás Redondo Terreros, fiu del antiguu secretariu xeneral de la UGT cayíu tres un escupuliciu de corrupción nuna macro cooperativa de viviendes del sindicatu, camuda’l rumbu haza un alloñamientu del PNV y una posición más gustante a les tesis antiterroristes del PP. Ello coincide con un alloñamientu físicu de Rosa qu’anicia un periodu d’eurodiputada y tamién se postula a la secretaria xeneral del PSOE nel malfadiáu congresu que proclama a Zapatero.
Les posiciones cada vegada más diverxentes de Rosa y Nicolás van llevar al abandonu del partíu per parte d’emtrambos, depués de que’l campeón de la mediocridá, Pachi López, y-faga la cama al segundu a instancies zapateriles na xefatura del partíu nel País Vascu –quiciabes fuera más propiu falar d’apuñalamientu pel costazu pero la correición estilística obligame al comedimientu- y dende entós tomen aldos estremaos. Nicolás como polemista políticu y Rosa haza la creación d’una opción política nueva.
Ye nesa fase final de tensiones cola xefatura del partíu cuando conozo a Rosa nel aeropuertu de Madrid, camín los dos d’Estrasburgu, y a la que me presento aprovechando la espera. Doi-y el mio sofitu sinceru a ella y a Redondo poles sos posiciones constitucionalistes –nesa dómina Alfonso Guerra presidía la Comisión constitucional del Congresu pero especializarase en facer l’exipcianu, poniéndose de perfil- y la incomprensión que reciben nel so partíu y ella agradezmelo y tresmiteme una impresión de credibilidá que va facer que dende aquel día siga los sos movimientos.
El pasu viniente de Rosa sería la creación de UPyD, una opción política transversal, en cuantu proponía soluciones d’esquierdes no social, pragmática no económicu y centralista tocantes a delles competencies en poder autonómicu. Los anicios foron duros énte la presión conxunta de los dos paladines del bipartidismu, pa los que representaba un peligru nidiu, pero adulces y al tiempu que la situación meyoraba nel País Vascu y se deterioraba en Cataluña –Ye la dómina en que Zapatero diz qu’España ye un conceutu discutíu y discutible, y afala un Estatutu catalán nuevu que naide pidía- va creciendo y paez consolidase. Doi-y el mio votu.
Pa la so desgracia, en Cataluña naz Ciudadanos, una opción socialdemócrata pa retrucar al independentismu énte la dexación del PSC. El so líder ye Albert Ribera, un mozu ensin pedigrí políticu pero reguiletu y con recursos comunicativos, y d’otru tipu, que crez esponencialmente ellí y darréu plantega’l saltu a nivel nacional lo que va llevar ineludiblemente a topetar con quien ocupa, con dellos matices, l’espaciu de centru, Rosa Díez. L’alianza paez natural, pero non.
Pa sorpresa de toos l’abrazu nunca llega a producise ¿Problema de principios o de persones? Y Ciudadanos rápidamente va absorber y agrandar l’espaciu qu’enantes ocupaba UPyD pa convertise nel partíu nacional que güei toos conocemos. Nel camín, congresu mediante y pérda de delles plumes, tresmutase en lliberal mientes crez de forma constante y algama a ser el primer partíu en Cataluña. N’Europa los Nart y Pagazaurtundúa d’UPyD apurren-y un plus de credibilidá como independientes mientes Rosa Díez se va a la so casa ¿Pa siempres?
Nos tiempos caberos, tiempos nos que la clas política española algama máximos de fondura nel pozu la escualidez moral de los sos líderes, Ribera pretendió algamar el sol pa tapar cola so solombra al PP, y pa ello escoróse alarmantemente a la drecha, y lo que ye peor, nel viaxe, como Ícaro, paez que se-y derritieron les ales, colo que s’arriesga a dase un bon güelpe al tomar tierra de forma repentina. Ye posible que’l güelpe seya de tal calibre que-y cueste remontar el vuelu. Vamos ver.
Ayeri, en Barcelona, Rosa presentóse acompañando al llicenciáu Casado –creo que’l títulu tien la mesma factura que’l doctoráu de Sánchez- y pidiendo’l votu pa él, dexando de llau que los sos vieyos correlixonarios presentense con C,s, y perfeccionando un nuevu movimientu ¿Ideolóxicu o personalista? qu’a min, antiguu votante de so, en cuantu centrista, déxame un tantu pasmáu pues nun sé si sofita al Casado aznarista o al Casado rajoyista, como per otra parte supongo que-yos pasa a munchos de los sos votantes. Y ye que Rosa ye mui inquieta anque a min vienme aquello de qu’al platu vendrás arbeyu.
Raúl Suevos
A 8 de payares de 2019
No comments:
Post a Comment