Les manaes de Pablo Iglesias y el señor Llobu

LES MANAES DE PABLO IGLESIAS Y EL SEÑOR LLOBU

Púnxose de moda la espresión de la mano d’un lapsus linguae del líder podemita mientes el debate eleutoral pero’l señor Llobu, personax tarantinescu maxistralmente interpretáu por Harvey Keitel na película Pulp Fiction, daba-y un significáu muncho más trescendente y rellacionáu cola realidá de les coses.

Ta güei la prensa falada y escrita n’España que se desfai n’eloxos a la referencia que SM el rei fizo ayeri en La Habana a la democracia y a los drechos humanos mientes la cena d’estáu énte’l so anfitrión, el presidente cubanu. Qu’ésti aplaudiere como si tal cosa da cuenta d’hasta qué puntu la frase fuera negociada polos respectivos ministros d’esteriores; convendría sicasí nun perder de vista la realidá de les coses; los ciudadanos cubanos, recipiendarios últimos desos buenos deseos, malapenes fueron conscientes de la real visita puesto que’l diariu Granma informó someramente y en Mesa Redonda, el programa políticu de la TV cubana, nun se va tratar más que de pasada, ensin alusión, por supuestu, a eses frases. Cabría recordar que más potente paeeció’l mesax del Papa Juan Pablo II na so visita a Cuba, y yá se vio.

La ciudadanía cubana vive na total miseria informativa, los medios de comunicación pertenecen al estáu y la prensa dixital independiente malapenes tien algame ente la población con mui limitáu accesu a internet. El cubanu d’a pie fórmase ya informase pente medies el “paquete”, un CD de venta illegal y salida quincenal nel que se carguen informativos y series d’España y Miami; pehí-yos va llegar dentro de dellos díes daqué del ecu patriu de la visita real y deses pallabres que, a estes altures, Díaz Canel yá va tener escaecío.

Na cabera xornada habanera’l gobiernu tamién-y preparó al rei un alcuentru con 30 representantes de la sociedá civil cubana, llamativamente la mayoría yá s’alcontraron cola mesma brevedá col presidente en funciones cuando visitó la islla. Nel grupu tenemos al inevitable Perugorría, el de más nomadía de los actores cubanos, Leonardo Padura, l’esitosu escritor, o Enrique Núñez, l’amu la Guarida, la paladar más famosa de la ciudá que lleva venti años faciendo sonar nos sos salones el “ente dos augues” de Paco de Lucia.

Nun hebo tiempu nin llugar pa les Dames de blancu u otru representante de la minimalista oposición cubana, güérfana de figura potente dende la desapaición d’Oswaldo Payá nel intre d’una operación 

chambona llevada a cabu pol entoncenes xefe de la mocedá pepera madrileña, tiempos de doña Espe, y qu’anguaño ta  llantáu pol so collaciu d’ansies moces, agora no más alto de Xénova, con un momiu de 60K de la comunidá madrilana. Carromero se llama y aínda más altu lu vamos ver.

Nun consta que tampocu s’entrugare por José Daniel Ferrer, líder de la UNPACU, Unión patriótica cubana, miembru daquellos 75 de la primavera negra de Fidel Castro condergaos sumariamente a 20 años por ser opositores al réxime y que Zapatero y Moratinos, nuna operación que namái benefició al gobiernu cubanu, traxeron pa España au duraron lo que los escasos subsidios del gobiernu, depués la mayoría coló pa Miami, dalgunos inclusive tornaron pa Cuba. Unos pocos, Ferrer ente ellos, refugaron dexar la islla y dende entós sufre l’acosu del G2 cubanu con detenciones arbitraries constantes.

Yá va un mes llargu de la detención cabera, anque nun se sabe si la visita real tuvo daqué que ver, y en 100 y Aldabó –el centru de detención pa políticos- eso ye munchu tiempu, tantu que la so muyer na única visita permitida atopose cola solombra del so home en llugar del paisanu enteru que detuvieron. Nin que dicir tien que, como suel asoceder en Cuba, nun esiste comunicación sobro los cargos que-y imputen; da igual, cuando convenga yá lu soltarán, non enantes.

Hebo tamién alcuentru colos empresarios españoles en Cuba, siempres en precariu énte los baxones na liquidez gubernamental, como nestos díes asocede, y siempres atentos al estáu del bloquéu pues saben qu’ensin él la so ventaya competitiva desapaez y Cuba tolo va mercar nel so mercáu natural, los Estaos Xuníos como yá asocede anguaño colos productos agropecuarios que vienen d’ellí mayoritariamente; eso sí, previu pagu en metálicu que’l señor Trump nun da en fiau.

Sobro estes coses nun lleí nin oyí un res nos maraviosos medios de comunicación social españoles y ye poro que nun pude menos que recordar al señor Llobu cuando dicía a los personaxes de Travolta, Tarantino y Jackson “dexemos de comenos la…los unos a los otros y pongámonos a trabayar”. Pues eso.

Raúl Suevos

A 14 de payares de 2019

Torna en castellán en repdiv.blogspot.com