Facía frio, frio enforma, aquella mañana de febreru de 1937
nes trincheres de les milicies populares d’Alcubierre, nel frente d’Aragón. Too
paecía tranquil hasta que, de secute, el runfíu d’un avión fizo-yos saltar nos
furacos que servíen de refuxu a los combatientes. Nun hebo fueu enemigu, nin
bombes, y nel so llugar escomencipiaron a cayer sobro la trinchera dellos
recortes de periódicu dando cuenta de la cayída de Málaga unos díes enantes.
Cuéntalo George Orwell, milicianu internacional ellí esplegáu
col POUM, y tamién cuenta cómo los camaradas xefes entainaron a negar la mayor
y esplica-yos que se trataba d’una operación de los fascistes de calter
sicolóxicu, que too yera mentira. Pero nun lo yera; unos y otros xugaben la
batalla de la desinformación o intoxicación, daqué tan vieyu como la propia
guerra.
A nivel internacional los medios pusiéromos al corriente de
les granxes de trolls rusos, axencies más o menos encubiertes nes que se diseñen
campañes de desinformación dirixies a influyenciar nes campañes eleutorales
occidentales, como fo’l casu de les caberes norteamericanes, y dicen que tamién
nel illegal referéndum de Puigdemont. Anguaño yá nu se tiren octavilles,
panfletos o recortes de periódicu dende los aviones; güei’l mediu au se combate
ye la red y nin tan siquier ye necesario qu’heba guerra, a lo menos declarada.
La guerra política siempres ta presente, la vida política ye una confrontación
perpetua y nella los simples soldaos de les trincheres somos toos nosotros,
sometios a tou tipu d’influyencies, más o menos sutiles, más o menos descaraes,
dirixies por unos y otros p’atrapar l’atención de nueso primero y el nuesu votu
depués.
Mientres esti tiempu d’afliximientu desapaecieron munchos de
los programes d’entretenimientu televisivu, queden dalgunos y con formatu
reducíu. Ente estos ta "El Formigueru”, que’l so direutor permitese facer, de
semes en cuando, delles declaraciones polítiques y nuna de les caberes dexó cayer
un comentariu negativu sobro la actuación del doctor Sánchez. ¡Válgame Dios¡
¡Pa qué más¡ un diluviu de comentarios
negativos cayó dende entós sobro’l comunicador; como enantes sobro Bertín
Osborne, o Kike Sanfrancisco, o cualquier qu’ose atacar la política d’esquierdes
o los sos representantes. Ye llamativo qu’esto nun asoceda colos comunicadores
allineaos a la esquierda, que los hai y que de continuo dexen cayer los sos
dardos, que baxo’l disfraz de la gracia gueten el desgaste sistemáticu de los
políticos alversarios, pero ¿Quién ta detrás d’estos ataques?
Col aportar de Podemos constatase una forma nueva de facer
política. L’escrache, neoloxismu qu’esconde l’acosu físicu a persones a la
manera del que-y facen en Cuba a los defensores de los drechos humanos, instalase
como espresión d’activismu, tamién l’aición direuta en redes. Juanma del Olmo,
actual secretariu d’estratexa y comunicación de la vicepresidencia d’Iglesias,
tuvo organizando talleres y encuentros d’activistes de redes dende'l so
anterior puestu de secretariu de comunicación de Podemos. Paez que lo fizo tan
bien qu’otros quisieron emulalu. Anguaño Podemos llánzase escontra VOX nel
tarrén xudicial; la red fai dañu.
Los memes suelen ser graciosos, cualquier pue facelos, pero
desgasten y d’una forma simple ayuden a variar la forma cómo se perciben
ciertes aiciones o persones. Los bulos tienen detrás una preparación más
complexa y xeneralmente busquen oxetivos más definíos. Unos y otros son más
peligrosos de lo que puen paecer, trabayen por acumulamientu y el so pesu,
pasáu’l tiempu, tien efeutos sobro la opinión pública.
Nada asocede por casualidá y los ciudadanos tienen na so mano
facer frente a estes formes nueves de desendolcar la contienda política,
aiciones que, amás, puen tener detrás l’aición d’axentes esternos. La defensa
ta na vixilancia individual de caun de nós. Ye lo que hai.
Raúl Suevos
A 20 díes vencíos d’abril de 2020
Torna en
castellán en abellugunelcamin.blogspot.com
No comments:
Post a Comment