Supongo que los melillites entá conocen la historia, pero non
el restu d’España. Tamos en 1893, aínda nin se perdiera Cuba y na contorna de
Melilla, en Cabrerices Altes, un destacamentu queda cercáu polos moros; equí lo
políticamente correuto sedría escribir enemigu pero la realidá ye que yeren
moros; muerre’l xeneral al mandu y la única solución ye unviar un enllaz a
pedir socorru a la posición de Rostrogordu, a un kilometru y picu baxo fueu
direuto. Presentense un capitán de Estáu Mayor y el so caballu, Príncipe, qu’ente
descargues de fusilería aporten al otru llau y descubren que los moros cortaron
el cable telegráficu y tamién cercao esta
posición. Namái queda intentar llegar a Melilla, a 3000 metros con tol camín
énte les llínees y el fueu de los moros. Otra vegada’l capitán Juan Picasso,
que asina se llamaba, y el so caballu galopien baxo’l runfíu les bales
enemigues y les aclamaciones de los sos compatriotes para, a lo último, algamar
la ciudá y llograr l’auxiliu pa los sos collacios.
El capitán Picasso recibiría por esta xesta la Medalla
Laureada de San Fernando, la máxima condecoración del Exércitu Español y yo va
tiempu que creo que Kevin Costner inspiróse nesta historia pa la inolvidable
escena del entamu de “Baillando con llobos”, la oscarizada película que dirixó
y protagonizó. Depués PIcasso siguiría la so carrera militar, algamando’l xeneralatu
y siempres calteniendo una fama reconocida d’integridá personal, tanta que, en 1919,
propuestu por Romanones pa Ministru de la Guerra refugó pues prefería “siguir
siendo un militar honráu”.
Pasaría a la historia, per embargu, porque n’agosto de 1921,
tres el tráxicu Desastre d’Anual, nomenlu por Real Orden pa que redacte un
informe, el demoledor Informe Picasso, que presenta n’abril de 1923 y que munchos
consideren una de les razones de la cayida de la monarquía. L’informe, cola
llegada de la Dictadura de Primo de Rivera, dormiría llargos años nos archivos
y Picasso, yá Teniente Xeneral, moriría en 1935 cola discreción que carauterizó
la so vida.
Tamos agora col Desastre del Coronavirus. España ye
cabezaleru mundial en muertos por millón d’habitantes, l’acabamientu de vieyos ye
daqué tan llerciosu que, si entá hai decencia, les siguientes xeneraciones vamos
tener d’avergoñamos no que nos quede, a políticos y prensa nin eso-yos algama;
sólo se salva’l personal sanitariu que’l so sacrificiu y altruísmu almira a tol
país, sacantes el gobiernu quiciabes. Poro, paezme a min que, en semeyante
ocasión, cumple guetar un home integru, alloñáu de los intereses políticos y
poro independiente que, sofitáu por una llei, redacte un informe de la mesma
profundidá que’l del Xeneral Picasso.
Un enfotu verdaderamente difícil esta busca nestos tiempos de
mediocridá anque, énte’l riesgu de descubrir que yá nun los hai, yo atrévome a
proponer al apocayá cesáu Xefe del Estáu Mayor de la Defensa, el Xeneral
Fernando Alejandre, que por trayeutoria personal ya institucional paez afayadizu
pal encargu. Ellos, los políticos, las élites estractores que mos dirixen, pondránse
probablemente d’alcuerdu, nesi Palaciu au anguaño se secuestra la soberanía de
los ciudadanos, para vendenos una Comisión investigadora que s’allongue nel
tiempu y acabe sacupando unes conclusiones que nun estropíen la imaxe de los
partíos políticos, los nuesos verdaderos dueños; y entós, señoras y señores, vamos
tener, una vegada más, la prueba de que nun somos ciudadanos sinon de nuevo
súbditos. Ye lo que hai.
Raúl Suevos
A 9 díes vencíos d’abril de 2020
Torna en castellán en repdiv.blogspot.com
No comments:
Post a Comment