¿ENTÁ SON DE FIAR LOS ESTAOS XUNÍOS?
El presidente Trump vien de visitar el Reinu Xuníu metanes un rumbu d’intervenciones sorprendentes que toes tienen como denominador común la faltosería política, daqué mui desavezao hasta’l so aportar a la Casa Blanca. Insultos personales al alcalde de Londres, recomendaciones de rotura radical a la premier May tocantes el Brexit, allugamientu personal per dalgún de los pretendientes a la direición del partíu Conservador, etc. tou un compendiu de metedures de pata si nun fuere porque’l mundu paez tar yá avezáu a esti comportamientu. Quiciabes non too seya casualidá, quiciabes hai una estratexa.
Cola cayída del Muru de Berlín nel 1989 Francis Fukuyama agoró “el Fin de la historia” baxo l’escud utriunfante de les democracies lliberales –lléase capitalistes- pero’l desorde, les tensiones polítiques y les guerres paecen conxuraes pa baltar les sos posibilidaes profesionales como profeta. Anguaño’l mundu ta muncho más complicáu que cuando la nomada Guerra fría apangaba los ánimos de la gobernanza mundial y los Estaos Xunios caltienen un lideralgu cada vegada más contestáu, especialmente nel llonxanu Oriente.
Balcanes, Afganistán, Ucrania, inclusive’l próximu Oriente, nun paecen tener entidá pa desestabilizar el mundu, más allá de lo que les grandes potencies consientan. La Rusia de Putin esfuerciase por estirar el pescuezu dende la fila d’atrás pa evitar que Trump y Xi, tan avalumbaos ellos, lu dexen ensin salir na foto, pero lo cierto ye que yá dende la dómina de Bush fíu, y de xacíu Obama, l’Imperiu ta pivotando estratéxicamente haza Oriente. China ye l’únicu alversariu anque paeza que, enagora, la batalla se desarrolle namái nel ciberespaciu del 5G.
N’Europa somos consumidores netos de Seguridá, con mayúscules, dende’l fin de la segunda Guerra mundial. La OTAN tien sido’l paragues que mos permitió desendolcar el nuesu estáu de bienestar ensin tener qu’endeudanos en demasía con gastos non productivos como son los exércitos; sicasí ¡bona cuenta¡ Europa dexó que los EEXX pagaran la mayor parte y dirixieran totalmente la organización. Pero los tiempos evolucionen y los caberos presidentes americanos pidieron, y Trump esixío con malos moos, que los países europeos amonten los sos gastos de defensa hasta’l 2% del so PIB. Nello, con más o menos iñerizu, tán.
Europa, nanu políticu y viérbene militar dende la dómina de la guerra en Bosnia, ye consciente de la
so necesidá de, amás de consumidor, aportar a proveedor de seguridá y pa ello, y sofitándose nel Tratáu de la Xunión, y de la mano de l’Alta Representante Mogherini, desarrolla y aprueba la so Estratexa Global en 2016, na que dalgunos ven la basa pa la futura Defensa Europea y que va a contar con dos catalizadores terribles, el Brexit y el señor Trump, caún coles sos carauterístiques.
Hasta equí too paez un anális de xeopolítica, y verdaderamente que lo ye, pero detrás d’esto siempres s’atopen los factores económicos y nesti casu tamos falando d’un mercáu mundial d’armamentos, güei encabezáu de forma nidia polos EEXX, que val 180.000 M de dólares añales y nel que los países europeos nun son namái vendedores, tamién alquieren, fundamentalmente nos EEXX, y en dambos casos facenlo de manera individual perdiendo asina les economíes d’escala.
Amás de camudar n’esportador de seguridá, la Unión, pente medies la Política Común de Seguridá y Defensa, busca convertir esa diversificación d’industries militares en daqué más européu, más grande y más conducente, dalgo al estilu d’Airbus por poner un exemplu, capaz de competir cola industria americana de mou que los emplegos, altamente cualificaos, permanezan n’Europa y, d’alguna forma, contribuyan a torgar que los nuesos mozos titulaos nos campus universitarios tecnolóxicos tengan qu’emigrar en busca de puestos en consonancia cola so cualificación.
Dende la publicación de la Estratexa Global Europea punxeronse en marcha 17 proyeutos PESCO, nomaos asina pol acrónimu inglés correspondiente a la Cooperación reforciada en materia de defensa. Tamién un Fondu de Defensa Européu de calter pluriañal y, finalmente, el FEAP, Fondu Européu de sofitu a la Paz.Toos ellos suponen un impulsu nidiu a la Defensa Europea, que non Exércitu Européu, y si’l señor Trump algama una segunda presidencia ye posible qu’Europa se vea “obligada” a crecer más y más rápido nesti ámbitu énte la falta de confianza nel so tradicional aliáu americanu.
A 5 de xunu de 2019
Raúl Suevos
repdiv.blogspot.com
No comments:
Post a Comment