Ye una ciudá que lleva dellos sieglos trepando cola sonadía
de ser la más rica d’Italia. Agora dicen-y capital económica del país pero, pa
la nuesa historia, queda aquello que dicía l’emperador Carlos: “Francisco, el rei
de Francia, y yo, namái mos ponemos d’alcuerdu nuna cosa, dambos queremos Milán”,
y ye que yá entós, tres el pasu de families de nombradía a la tiesta del ducáu,
como los Visconti, o los Sforza, la ciudá, capital de la Lombardía, tenía fama
de xenerar muncha bayura. Anguaño sigue asina.
Col programa Erasmus y los viaxes de baxu coste, la qu’enantes
yera destín d’executivos al socaire de les estremaes y abundoses industries qu’ellí
residen, agora ye un formigueru de xentes de pelaxe diversu, y, sicasí, variada
raza, que verbenen per toes partes con atracción especial pela plaza del Duomu,
la catedral, y la so redoma, lo que fai que, en munchos casos, la visita a la
ciudá acabe siendo pa escaecer.
A nós, en visita familiar na ciudá, garrarónmos los rabotazos
caberos de la penúltima borrasca, que yá nun recuerdo si llegó a ser bautizada.
El casu ye que, el miércoles pasáu, con nevada lixera na ciudá hasta les diez de
la mañana, decidimos aventuranos nel centru, en plan a ver qué pasa. Y pasó que
taba perfeuta.
Baxamos en metro hasta Lima, en plenu Corsu Buenos Aires, un
pocu enantes de la ablucante doble Porta Venezia, coles sos tiendes de grandes
firmes y la so xente guapa cargando bolses de nombradía, anque col fríu
reinante namái algamamos a ver una pareya de xaponeses? Chinos? Ca día ye más difícil
estremalos. Ellos mesmos yeren un espectáculu de moda, ensin necesidá de la
compra recién fecha. Nun escaparate lucíen unos texanos estratéxicamente rotos
combinaos con un minianorak mariellu doráu, anque pa nun asustar nun poníen el
preciu. Enfrente, l’edificiu d’Armani suxería a los mortales güeyar pa otru
llau.
La cai, amás de moda, tien una coleición d’edificios
neoclásicos que quita l’hipu, anque tou paez d’acordies cola redolada, inclusive
los tranvías modelu vieyu de los que la ciudá caltien un gran númberu. A la fin
torcemos a la drecha, y anque se divisa yá l’ábside catedraliciu, güei en parte
n’obres y ocultu por una superpantalla publicitaria, nós guetamos otru tesoru,
non siempres al algame del personal debío a les coles descomanaes, casi como
les del Duomu. Trátase del pancerotto de la panadería Luini que, fechu con pasta
de pizza y rellenu, nel nuesu casu con mozarella y tomate, vamonos comiendo
pela cai ensin tener qu’esperar gracies al fríu del día.
Va siguir.
Raúl Suevos
A 22 díes vencíos de xineru de 2023
No comments:
Post a Comment