Siempres me prestaron les conferencies. Suelo tar al día de
les programaes na mio ciudá y poro apename tomar conciencia de la mio condición
provinciana, porque la realidá española ye que, como en casi tolos órdenes, ta
lo de Madrid y lo de provincies.
Pertenezo a esi grupu de bichos raros que, llibreta en mano, toma
notes nes conferencies. Nel mio casu porque la mi memoria de mosquitu obligame,
y dempués, colos repasos d’eses llínees, intento afondar nel asuntu, si ye que
merez la pena, y dir un pocu más lloñe. Acumulo yá, cuestión d’edá, varies llibretines
cargaes d’escritura apretada que namái’l so propietariu podría descifrar.
Esta mañana quien manda na casa entrugóme si podía tirar una
d’elles, y al repasar lo qu’ellí había, pa min un tesorín, atopeme coles notes
d’una conferencia nel Club de Roma de Madrid, un 15 d’avientu de 2014, que’l so
títulu yera “el nuevu (des)orden mundial”, y ente les notes que tomé, les tocantes
al señor Martín Ortega Carcelen, entoncenes lletráu y profesor universitariu y
anguaño analista principal del Real Institutu Elcano amás de lo anterior,
apuntaba en rellación a Rusia, cola ocupación de Crimea reciente, y los restos
del avión de KLM derribáu polos rusos sobro’l Dombás recién aportaos a los
Paises Baxos pal so estudiu, que: “Rusia tien cuatro problemes, demografía,
esperanza vital de 60 años, educación probe-meyor cola URSS, economía de
mono-productu y estructura oligárquica, líder fuerte y hai qu’atopar una salida
honorable pa Putin”, unes sintétiques marruques que dan pa pensar ocho años
dempués, o a lo menos pa repasar.
Tocantes la demografía y la esperanza vital, tenemos qu’añader
al problema perenne del alcoholismu, la bomba demográfica que representa la muerte
de más de cien mil mozos nos frentes de guerra, a los qu’hai qu’amestar el millón
calculáu de mozos n’edá militar y con formación universitaria, especialmente
los de les nueves tecnoloxíes, que, tres fuxir de Rusia, amás de facer baxar
asperamente esa esperanza vital, van a emprobecer el texíu cultural-económicu
de la nación. En rellación al monoproductu económicu, a la vista ta, puestu que
los europeos sofrimoslo cola situación anguaño de suministros y precios de los
productos enerxéticos pero pa Rusia, lloñe de meyorar, agora vense espulsaos d’un
mercáu llibre y abiertu, como yera enantes de febreru de 2022, p’atopase nes
manes de unos pocos veceros, especialmente China y la India, en condiciones d’esixir
unos precios mui desfavorables pa Rusia.
Quédamos la cuestión Putin, al que ca vegada veo más acorraláu
y con menos posibilidaes p’alcontrar la salida honorable que suxería Ortega
Carcelen. Y les fieres acorralaes son mui peligroses.
Raúl Suevos
A 30 díes vencíos de xineru de 2023
No comments:
Post a Comment