Casualidaes de la vida, tengo una bona amiga de nome Ana
Belén, que ye un nome abondo estendíu na mio xeneración, anque nun sé por qué.
Ye una señora d’estilu, actitúes y pensamientu que podríemos describir como
clásicu, o conservador, anque cuando dambos yéremos mozucos yera de les más
aguerríes y desinhibíes, por dicilo d’una forma sele.
El pá d’Ana Belén yera un señor de misa dominical, traxe y
gafes escures, y pelu engomáu peináu p’atrás, que ficiera la guerra nel bandu
nacional y, anque nun tengo acordanza d’a
qué se dedicaba, taba bien asentáu, pos tenía un Seat 1500 cuando mio pá entá
pagaba les lletres del pisu de Cimavilla. Pero al pá d’Ana Belén el
conservadurismu d’entós venía-y estrechu, yera un troglodita auténticu en cuestiones
sociales, especialmente les qu’afeutaben a la so fía y los mozos de la so
rodiada.
El resultáu de too esto fo que la mio amiga reaccionó
fundiéndose nos estudios pa poder colar pa Madrid y alloñase del so pá; y, pocu
dempués, averándose al partíu comunista, que yera l’antítesis de les idees
polítiques del pá. Anguaño, tres una vida rica de peripecies, ye una simpática
señora arraigonada otra vegada na maraviosa Xixón.
La casualidá ye qu’estos díes vinientes van poner en llibertá
nos Estaos Xuníos a Ana Belén Montes, considerada la espía más dañible pa esi
país. Ella tamién tenía un padre híperconservador, mélicu de les fuercies armaes, que nuna de delles so bases alemanes ñació la protagonista. Y tamién
ella reaccionó con mui bonos estudios pa colar del tresnu paternu. Yeren los
pacifistes años 70, y Ana Belén, con un curriculum perrescamplante en rellaciones
internacionales, entró lluéu a trabayar pal gobiernu, p’acabar como analista
xefe p’asuntos cubanos n’Axencia d’intellixencia de les Fuercies Armaes
norteamericanes.
Acabaron cazándola. Dempués de dellos años de pasar información
a los cubanos, especialistes ellos n’infiltrar los servicios yanquis. Había pa
una conderga a muerte pero la so declaración de culpabilidá dexó-yla en
veinticinco años, que se cumplen nestos díes, aunque van siguir cinco más de llibertá
vixilada. Ye lo qu’hai.
A Belén, al contrario de los axentes de la red “avispa”,
tamién atrapaos va dellos años mientes acorviaben a los emigraos cubanos de
Florida, nunca tienen tratao, que se sepa, de trocala por dalgún de los mazcayos que de xemes en cuando garren con drogues, o paecío, na islla bonita. Quiciabes
nun se fíen d’ella, ensin raígañu cubán; quiciabes ye que yá nun ye rentable;
quiciabes ye que nun hai que dexase llevar de la influyencia paternal, anque seya
negativa.
Raúl Suevos
A 4 díes vencíos de xineru de 2023
No comments:
Post a Comment