Aristóteles definía tres tipos básicos de sistema de
gobiernu, la democracia o gobiernu de toos, l’aristocracia o gobiernu d’unos
pocos y la monarquía o gobiernu d’ún. Nesti casu caberu atopábase la variante
de la tiranía qu’aportaba al poder xeneralmente por valtiamientu de l’aristocracia
y como dexeneración d’esta.
Aristóteles nun consideraba
la democracia como la meyor solución y les sos idees dalguna importancia
tuvieron depués, pos él fo l’educador principal d’Alexandru Magnu. Amás d’estes
soluciones de gobiernu tamién se contemplaba un casu de tiranu temporal. Llegabase
a ella por clamor de la ciudadanía en tiempos d’especial afliximientu nacional
y consistía n’otorga-y a un personax, mientres un periodu llindáu, poderes
absolutos pa tratar de remediar el problema qu’amenaciaba l’estáu, y después
d’ello colaba pa casa.
Güei, cuando enfrentamos el coronavirus, podemos decatar,
polos resultaos, que los gobiernos fuertes –axetivu candial- paecen tar meyor
preparaos p’alcontrar soluciones y resolver la situación; el güelpe na mesa de
Xi Jimping en China va quedar grabáu d’una miente exemplar na memoria de munchos,
y anguaño China puese permitir el luxu de dar conseyos y sofitar con mélicos y
materiales a los que nun va muncho los güeyabemos penriba’l costazu.
El so vecín rusu paez que caltien la situación baxo control y
Putin, llístu él, propón una reforma constitucional que lu va caltener nel
poder tovía per munchos años. Nel sur, el nuesu amigu Mohamed VI vien de
decretar un bloquéu total del país cuando namái tien 29 positivos, pero’l
sistema ye una monarquía constitucional na que’l monarca caltien poderes
impensables nes democracies lliberales.
En dellos países democráticos vemos qu’al poder aporten
personaxes que faen que’l sistema derive no que se conoz como populismu
democráticu, -otru síntoma dexenerativu- como sedría’l casu de Donald Trump,
Boris Johnson; o n’Iberoamérica Jair Bolsonaro o López Obrador. Nestos casos la
decisión ye la del xefe, ensin elementos que modulen lo que, en rellación col
virus, paecen más ocurrencies que decisiones de gobiernu.
Nel otru llau tenemos los gobiernos europeos, ente los que
s’alcuentra l’español, qu’en munchos casos cuenten con más d’un partíu nel
mesmu, los nomaos de coalición; gobiernos de partu difícil y de complicáu
procesu decisional. Con tantes tensiones internes que faen que les lleiciones
que China mos dio nun seyan tomaes en cuenta y asina, primero n’Italia, depués
España, aínda más tarde Francia y Alemaña, retrasen l’entamu de la batalla más
de lo que fuere de deseyar.
El coronavirus va decimos si facía falta un tiranu o gobiernu
de salvación nacional.
Raúl Suevos
A 16 díes vencíos de marzu de 2020
Torna al
castellán en repdiv.blogspot.com
No comments:
Post a Comment