Espulsada d’Esquierda Xunida, creo qu’ensin escarniu públicu,
pero igual da. La precursora del feminismu n’España, la qu’anició a dar la cara
metanes la mayor incomprensión, la de mio incluyida, cuando la democracia
española malpenes atatexaba, foi espulsada xunto col so partiu, el Partiu Feminista
d’España, d’esi pistu de verdures mal rehogaes y desechos ideolóxicos en lo que
se tien camudao Esquierda Xunida. Col sofitu, ye un suponer, d’esi líder de
talla inigualable qu’anguaño dirixe los destinos de la formación.
Lidia Falcón siempres trabayó pola igualdá ente l’home y la
muyer, igualdá qu’entá tien camín delantre, y yo confieso que, mozucu entós,
nun-y otorgué, nel entoncenes de los sos entamos, nin un mínimu de comprensión.
Depués llegaría’l trabayu con muyeres nes Fuercies armaes, españoles y europees,
muyeres descomanaes que me obligaron a abrir los güeyos y reconocer la mio
falta d’empatía, o meyor, la mio babayada. Llueu, el duru abrise camín profesional
d’una fia, fízome batallosu. Toi con Lidia Falcón.
La llucha del Partiu feminista víose asombrada por una opa
contraria llevada a cabu dende les files de les nueves feministes, eses que, dende les calefactaes aules universitaries
nunca se vieron solmenaes pol friu de la cai o los emburriones de los entós
grises, depués maderos y anguaño antidisturbios; elles saltaron ensin solución
de continuidá del asaltu destetáu a capilles desguarnies a los despachos de
ministerios y autonomíes. Los acuerdos de gobiernu son una mina de puestos y
asesores a déu.
Too esto asocede baxo la direición d’una muyer que, visto lo
visto, cada día recuérdame más a Jiang Quing, la muyer cabera de Mao,
cabezalera de la Banda de los cuatro y responsable de les atrocidaes de la
Revolución cultural china. La nuesa muyer, como ella, amuesa un gran mambís pol
mandu y la radicalidá que la lleva a espulsar del círculu del poder a toos
aquellos que discrepen. Afortunadamente nesta dómina yá nun se pueden montar
daqué como los Procesos de Moscú, non porqu’ellos nun quieran, y asina los
disidentes, como Lidia Falcón, o como Iñigo Errejón, salvense d’una autocrítica
pública enantes del pelotón. ¿Va ser Errejón un asonsañu de Deng Xiaoping?
El movimientu nuevu, nel que se entemecen, transexuales,
lesbianes, u homosexuales, ye una amenaza pa la muyer feminista, esa que, sólo
y nada menos, busca la igualdá de drechos col varón, y namái paez interesáu en
escontiar la posición del gran timonel de la formación, cada día más estalinista,
cada día más descaráu nes sos mires totalitaries nos que, como vimos nestos díes
caberos, hasta los periodistes disidentes son amenaciaos cola cárcel y ye a
acusar de machismu a los sos colegues de gobiernu.
Este fin de selmana, metanes una crisis sanitaria que
desaconseya les multitues, vamos ver a munches d’eses feministes nueves, y munches
cándides, desfilar sofitando a los mesmos qu’espulsaron a Lidia Falcón. La
precursora que recuerda a Francisco Miranda, precursor de la independencia
hispanoamericana entregáu pol so subordináu Bolivar a les fuercies de la Corona
a cambiu d’un visáu pa poder escapar a salvo él y los sos secuaces. Como dicen dalgunos,
ye lo que hai.
Raúl Suevos
A 6 de marzu de 2020
Torna en castellán en repdiv.blogspot.com
No comments:
Post a Comment