Los gobiernos de la mayor parte’l mundu tienen nesti
momentu’l coral encloyáu ente una pandemia que la ciencia nun paez ser a
detener y al que’l control social namái algama a apangar nel so espardimientu. Hai
dellos, como’l d’El Reinu Xuníu, que pretendieron desprecialo pero que
rápidamente tuvieron, tienen, qu’adoptar la táutica de la mayoría, l’acuartelamientu.
Per embargu aínda esisten otros, dictadures anacróniques, nos que se pretende
cabalgar el tigre como si a él, de la mesma forma que faen cola so población,
pudieren pesllalu col mieu y la policía. Nun ye asina y la bestia va acabar por
taramialos.
Tamos güeyando n’Europa cómo’l retrasu n’aplicar midies ta
siendo pagao cola saturación de les UCI,s y con ello la muerte de más enfermos
de los que se produxeren con una respuesta rápida, a la china, o meyor entá, a
la coreana. Nel otru estremu siguimos teniendo a les dictadures
hispanoamericanes, poques en númberu pero despiadaes colos sos ciudadanos. Falamos
de nuevo de Venezuela, Nicaragua y Cuba. Siempres Cuba, la Cuba castrista, la
Cuba de Raúl.
Na islla, por nun tener, nun tienen nin augua. La epidemia
aporta nun añu de gran seca y el banzáu principal provisor d’augua de la
capital ta al 20%, lo que fai qu’heba barrios nos que namái esquita l’uagua de
los caños cada tres díes y mientres un espaciu curtiu de tiempu ¡como pa lavase
de continuu les manes¡ Los salideros, esi particular nome habaneru pa los
escapes d’augues fecales son reconocibles pol ataque repentín al olfatu cuando
camines pola Habana Vieya. Asepsia n’estáu puru.
Falar d’escasez de materiales pa los hospitales o del estáu
de los propios hospitales cubanos ye ensin dulda un escarniu, pero les autoridaes
cubanes siguen na so política de refugar lo evidente. La peor crisis alemana
dende la Segunda Guerra Mundial, acordies la canciller Merkel, nun afeuta malpenes
a la islla, que declara sólo una docena
d’infectaos. Nos medios d’información oficiales critícase a los países europeos
como exemplu negativu de respuesta a la crisis y emponderase como exemplar el
modelu propiu y de los sos camaraes totalitarios. LLuniegu.
Pero, magar que la población cubana ye la más vieya del
hemisferiu y el Coronavirus va actuar como si fuere la tercera de les Parques
armada de guadaña nes superpoblaes cuarteríes habaneres, hai na islla muncha xente
que contempla la situación esperanzada pues, por más que s’atrincheren nes sos
mansiones de Miramar y Siboney, l’avanzada edá de la dirixencia castrista de la
islla, entamando por Raúl Castro y los sos 88 años, va facelos desapaecer y
asina ye probable que Cuba, finalmente, algame la llibertá.
Raúl Suevos
A 19 díes vencíos de marzu de 2020
Torna en castellán en repdiv.blogspot.com
No comments:
Post a Comment