L'home del sacu ta na puerta

Tábemos tan sele, pendientes de la Champions, siguiendo como daqué llonxanu y ayén les informaciones que diariamente aporten de China, a lo último “los nuesos” yá salieron del Gómez Ulla ensin novedá, cuando de secute descubrimos que tamién n’Europa pue asoceder, tamién equí’l confinamientu d’una población ye dalgo perfeutamente posible, y lo que ye peor, el coronavirus.

Ye como si l’home del sacu, esi qu’enantes s’usaba pa meter mieu a los neños –agora pue ser una forma d’acosu susceptible de denuncia- tuviere picando na nuesa puerta. ¡La epidemia yá ta equí¡ y de mano sentimos un respigu de llerza. Güeyámoslu dende la mirilla la puerta, ensin abrir, cola esperanza de que se canse y se vaya pero sabiendo, a lo fondero, que nun va ser asina, que va acabar por colase per un ventanu, pelos respiraderos del bañu, o per dalgún sitiu que nun controlamos. Ye lo que tien la llerza.

En tiempos antiguos les pestes tardaben dellos años en desplazase. Facíenlo al llombu de comerciantes o pelegrinos, esto ye, a pie y con munches y llargues paraes. Cuando atopaben una frontera piesllada por razones polítiques podíen detenese meses, inclusive años, anque acababen por pasar y diezmaben la población d’Europa. Agora too ye muncho más rápido.

El mundu fízose, a güelpe d’avión, muncho más pequeñu que’l del Medievu; y los viaxeros nun son unos pocos sinon que son millones, munchos más col inventu malinu de los vuelos de baxu costu. La cifra de pasaxeros anuales ye estelante. Si enantes nun se podía pone-y puertes al campu agora facelo nel cielu ye entá más difícil. Y Codogno, el centru del coronavirus italianu, ta a una hora de camín de Milán y Bérgamo, perimportantes nodos aéreos con varios vuelos diarios haza España. 

Con too y con ello nun hai ainda motivu pa preocupase puesto que’l nuesu sistema sanitariu ye de gran calidá, acordies coles pallabres del presidente del gobiernu ayeri en Bruxeles, y nun voi ser yo quien dulde de la pallabra d’un presidente. Quiciabes va haber que ver lo que piensen los conseyeros autonómicos cuidao que la competencia ye d’ellos o quiciabes pensaba’l presidente nel sistema de sanidá militar ensin saber –eses caxigalines nun son de la so competencia- que por instalaciones y plantilles ta anguaño cuasi desguazáu. Daqué tendría na tiesta, seguro.

L’hombe del sacu pue güei amarutase d’histeria coleutiva, como n’Ucrania, con xentíu acantellando l’autobús au se conducía a compatriotes non contaxaos haza la cuarentena. ¿Tarán les granxes de trolls rusos detrás d’eses manaes? Nunca se sabe, anguaño too ye posible y la guerra tolo xustifica pero, sicasí, el gobiernu de nueso faría bien en dir un pocoñín más allá puesto qu’esta vegada nun hai entá retro-virales disponibles como cuando, pa resolver la posible crisis d’imaxe gubernamental cola Gripe A de 2009, Trinidad Jiménez mercó 37 millones de dosis que nunca llegaron a usase.

El nuesu gobiernu de coalición ye, por construcción, un gobiernu feble al qu’acesmen en cada rellabicu del camín amenaces estremaes, la so propia composición, la escayente economía, los independentismos rampantes y agora esti home del sacu cargáu de coronavirus. A ver si ye a igualo.

Raúl Suevos

A 22 díes vencíos de febreru de 2020

Torna en castellán en repdiv.blogspot.com