Foi “1917”, depués de la oscarizada Parásitos, la película
más comentada nestos meses caberos, y tamién mui premiada n'ámbitos estremaos
de la industria cinematográfica. Yo fui a vela porque soi adictu a les películes
de guerra, como otros lo son a los videoxuegos y otros al pornu. A min, de
siempres, enantes yá d’ingresar na Academia Xeneral Militar, díbame la marcha
les películes de guerra, qué-y vamos facer.
El casu ye que col pasu los años, y depués de munches pelis,
nun puedo presumir d'espertu pero sí que me fici la mio particular
clasificación y, desgraciadamente, “1917” nun va a tar ente les preferies de
mio y ello ye asina por falta de motivación. Sí, ta mui bien fecha; eso del
planu continuu queda muncho bien y téunicamente debió ser daqué mui ponderatible,
de fechu los premios Oscar recibios son toos téunicos, pero nun me paez que
vaya muncho más allá. Entiendo que los BAFTA la enllenaren de premios, a lo
último los fios de la Gran Bretaña son superaos nel barrer pa casa namái polos
franceses, inventores del chauvinismo. ¿Entós?
La hestoria que cuenta ye fabulosa, simplemente, nun ye
creíble. Mendes diz que ye un sumatoriu de varies hestorias pero eso nun la fai
sostenible. En “Salvar al soldáu Ryan” Spielberg cuenta una hestoria maraviosa
y tarrecible, agregáu de les individuales del capitán Miller y los sos homes;
una hestoria inxusta na que muerren los meyores, como tien de ser, porque la
guerra ye asina d’inxusta y espantible. El ser bona persona nun te salva, nin
siquier el ser un supersoldáu, la palotola
vagante, estrueldosa espresión italiana pa la bala perdida, nun reconoz
habilidaes de naide; tampocu les esquirles de metralla. Y los soldaos nel
combate nun son persones, son animales acosaos -tamién ehí gana por goliada
Spielberg- animales que reaccionen baxo la mayor de les presiones, la muerte,
qu’en batalla vien de frente ensin estremar a naide.
Spielberg amuesa yanquis matando alemanes desarmaos na
trinchera. En “la Delgada llínea collorada” de Terence Malick tolo rellativu a
la vulnerabilidá y la ruindá humana baxo l’estrés de combate, también la
grandor, ta más nidio, poro ye, esta sí, una película de cultu. El señor Mendes
propónmos unes escenes de bondá british pagada con traición boche –l’aviador- o
supervivencia estrema del protagonista caberu énte la torpeza alemana que por
esaxerada fai perder credibilidá al guión.
La parte antimilitarista correspuende-y, como ye habitual, a
los mandos, inhumanos, el Xeneral del entamu y, sobre too, el coronel a la fin.
Nengún algama na so carauterización a la frialdá de los xenerales de la
magnífica “Siendes de Gloria” de Kubrick, tamién mui comentada con ocasión de
la muerte de Kirk Douglas, o la más tarrecible que mos amosaba “Johnny cogió su
fusil”, anque ye otra vegada Malick quién más s’vera al revelamos los niveles
estremaos d’implicación mental y moral según los graos militares.
No qu’a combate puru se refier tampocu “1917” apurre nada
espectacular. El planu del asaltu final y la trinchera nun emocionen, queden
mui lloñe del desembarcu na Omaha de Normandía del capitán Miller y los sos
mozos; ellí ún, encloyáu na butaca, pue maxinase’l terror d’aquellos homes
aboquiaos a desembarcar baxo una llovíu de fueu, la tómbola de la muerte. Esos minutos
iniciales son sólo comparatibles al combate nocherniegu de “Platoon”, aquella
esitosa peli d’Oliver Stone.
A lo último, qu’a min, como que nun me dixo un gran qué esta “1917”
de Sam Mendes, nin siquier que les guerres desendolquenles los políticos y non
los militares, y ello magar que-y la
dedicare a un de los sos güelos, participante obligáu na Gran Guerra, que ye
como nos países europeos se conoz a la I Guerra Mundial.
Raúl Suevos
A 12 días vencíos de febreru de 2020
No comments:
Post a Comment