Na sociedá opulenta na qu’habitamos, o eso creyemos, ye cada
vegada más anormal que mos averemos a realidaes desagradables. La pandemia
anguaño, ensin llegar a ser la peste medieval, recordónos la vixencia
permanente de los cuatro xinetes del apocalipsis, con un escape a la esperanza
representáu pol caballeru blancu. La guerra, a llombu del caballu alazán, visitanos,
o visitaba, cada vegada más esporádicamente, y siempres lo facía n’escenarios
aparentemente llonxanos; inclusive la tarrecible guerra civil yugoslava, na que
los soldaos de nueso participaron baxo la bandera ONU y la de la OTAN, paecíamos
que yera cosa d’otros tiempos y llugares; asuntos de tresnochaos comunistas.
Más recien, entá güei, los nuesos militares esplieguen nel Sahel, la
Extremadura d’Europa, pero nun queremos enteranos de que mos afeuta, y entá lo
va facer en mayor midida col pasu del tiempu. Somos Occidente, el primer mundiu,
la guerra nun va con nós.
Ye poro, quiciabes, qu’ente nós triunfen les sagues d’aventures
ambientaes en dómines ahistóriques, como’l Xuegu de Tronos, o la anterior y quiciás
de valires más fonderos, el Señor de los aniellos, nel que conocimos una
Comunidá del aniellu de nidiu ideal defensivu, cola que toos mos sentíemos
identificaos dende la comodidá de los nuesos asientos, más si lo acompañábemos
de una birra abondo fría y unos pistachos. Esi ye, en xeneral, el nuesu conceutu del terror, representáu por
Saurón, y de la defensa, definida pola Comunidá del aniellu.
N’Ucrania nun vemos al maliñosu Saurón, pero Vladimir Putin
paezse-y cada día más, y, cuando la maquinaria de la comunicación pública acabe
el so trabayu, vamos duldar si nun sedrá un descendiente d’aquel; pero, sicasí,
tamién mos damos cuenta, la mayoría d’europeos, de que mos falta una Comunidá
de la Defensa para poder facer frente a esti tipu de situaciones. Méritu de
Putin, y ensin dulda de los esforzciaos defensores ucranianos.
El casu ye que ya tuvimos una, la Comunidá Europea de la
Defensa, sofitada pol xefe de gobiernu francés d’entoncenes, 1950, roblada
polos xefes de gobiernu de los seis países fundadores de la Comunidad Europea en
1952, y refugada na Asambleya nacional francesa pol grupu nacionalista del xeneral
De Gaulle en 1954. Una pena, pues yera un proyeutu magníficu qu’hasta los
yanquis impulsaban yá que lu veíen perfeutamente compatible cola OTAN, creada malapenes
un añu enantes, en 1949. Los gaullistas nun queríen una Alemania rearmada, yá
ven vustés.
Güei tamos col caballeru colloráu galopiando peles llanures
ucranianes y, anque la reacción europea ta siendo superior a lo que cabía
esperar, échase de menos a la Comunidá del aniellu, la real, la de la Defensa
europea.
Raúl Suevos
A 2 díes vencíos de marzu de 2022
Torna en castellán en revdip.blogspot.com
No comments:
Post a Comment