El Mar de la China meridional ye más grande que tol
socontinente índiu y lleva quantayá abondo caliente, pero nestos díes caberos
ta que fierve, y esto nun asocede pol avance del cambéu climáticu. Na zona
norte atópense les islles Paracelso que la so soberanía disputen China, Taiwán
y Vietnam; ellí los chinos fondigaron un pesqueru vietnamita nun va muncho; nel
sur tenemos les islles Spratly en discutiniu poles mesmes naciones, a las que
s’amesten Malasia, Brunei y Filipines; ellí tamién los chinos fondigaron un
pesqueru filipinu. Son maneres de matón de barriu.
La política china nel área defínla un petón coralín, el Fiery
Cross Reef, que debe’l nome a un barcu fondigáu ellí va yá abondos años. China
fizo pie cola sida d’una autorización de NNXX pa un observatoriu sobro’l Cambéu
climáticu. El talu observatoriu cuenta agora con una pista aérea de 3000
metros, hangares protexios, radares y bateríes de misiles. El So xestu caberu
consistió n“enganchar” con un de los radares a un barcu de la Armada filipina,
esto ye, el pasu previu enantes d’abrir fueu, lo que comporta una aición mui
pocu amistosa que Filipines contestó con
una protesta diplomática.
Les ambiciones chines tocantes el so estatus de gran potencia
yá son abondo difíciles de despintar; hasta agora procuró llevar un política
basada na diplomacia económica, les sos inversiones a lo llargo del mundu, cuasi siempres a la
gueta les materies primes qu’alimenten la voracidá de les sos industries,
obliguenla a asegurar les sos llínees de aprovisionamientu, ente elles
especialmente les marítimes. Estes necesidaes son les que xustifiquen la gran
medría de les inversiones destos años
caberos na armada china y también la so política invasiva nel Mar de la
China.
Los EEXX caltuvieron, dende la Segunda Guerra Mundial y hasta
la presidencia Obama, una política d’alcuerdos con munchos socios nel Llonxanu
Oriente que se tien visto en peligru col aportar del señor Trump y la so
política aisllacioniste, y que China nun dudó n’aprovechar pa siguir colos sos
avances pola vía de los fechos; munchos de los países afeutaos dependen güei,
económicamente, más de China que de los EEXX y la política actual de contención
que paecen desendolcar estos, recordando otros casos históricos, nun paecen ser
una bona promesa de futuru.
La crisis del
coronavirus tien y va tener mui entreteníu al mundu pero China ye abondo vieya,
grande y potente como pa siguir alantre colos sos planes y nel gran xuegu xeopolíticu
les aiciones poco meditaes puen resultar peligroses pero les inaiciones –la
falta de respuesta de los EEXX- puen llegar a ser muncho más peligroses como
yá-y asocediera a Neville Chamberlain y la so política de contención.
Raúl Suevos
A 2 díes vencíos de mayu de 2020
Torna en castellán en repdiv.blogspot.com
No comments:
Post a Comment