Na película El reinu de
los cielos, de Ridley Scott, direutor que poques vegaes defrauda, hai una
secuencia na que’l protagonista se prepara pa saltar a Tierra Santa, ye’l Puertu
sicilianu de Mesina, mientres dellos sieglos pieza fundamental del comerciu
marítimu nel Mediterráneu oriental. El trasiegu de cruzaos nun se detendría
hasta la cayida de San Xuan d’Acre nel 1291 pero, aínda asina, xenoveses y venecianos
siguieron faciendo mui bonos negocios colos estremaos ramales de la ruta de la
seda y tamién coles rutes marítimes que dende’l Llonxanu Oriente trayíen les
especies hasta les sableres d’Arabia.
En 1347 doce galeres xenoveses aportaron a Mesina. Los sos
escasos tripulantes y paxajeros veníen en condiciones peores que los collacios
de Xuan Sebastián Elcano tres la circunnavegación. Veníen de Caffa, una ciudá y
centru comercial na península de Crimea que los mongoles de la Horda de Oru intentaren
en devanéu asaltar pues llegaron ellí con una carga desconocida nes sos montures;
una carga que viaxaba nel sangre de les pulges y parásitos que los acompañaben
dende los fonderos desiertos d’Asia Central.
Yera la peste negra la que viaxaba nes galeres xenoveses y
mientres munchos años, pues hebo varies recayíes, Europa, apavoriada, asistió
al derrumbe de la so economía. Venecia perdió’l 60% de la so población,
Florencia más del 30%; paecies morrines a lo llargo y ancho del continente. El
cambéu fo tan brutal que dio nacimientu a un mundu nuevu, si bien de forma más
pausada que cuando Castilla alumbró al Nuevu Mundu.
Les potencias comerciales, cola cayida de la ruta terrestre
de la seda, tuvieron que reinventase, a mayores precios, de xacíu. La mano d’obra
europea, cuasi desapaecida, multiplicó los sos salarios, lo que llevó al
amontar de los precios de les Commodities,
el trigu especialmente, y ello llevaría de la mano procesos inflacionarios
descomanaos. Desapaecieron fortunes y entamó l’amanecida d’otres; Silvestre de
Medici algamaría en 1378 el cargu de Gonfaloniere de Florencia dando llugar a
una saga d’algame mundial –el retablu de Damian Forment de la ilesia de San
Miguel de Zaragoza presiedelu l’escudu mediceo del Papa que pagó la obra- que
taría detrás de daqué tan transcendente como’l Renacimientu.
N’España, ente otres coses, la peste aceleró’l fin de los
malos usos sobro los palleses de remensa catalanes, tamién l’aportar de
capitales italianos y alemanes y, de resultes, l’aceleración de la navegación
atlántica ibérica que llevaría a América. Tamos falando del cambéu del mundu,
daqué provocao indireutamente por aquella peste llegada d’Asia.
Güei ye un coronavirus el que llega daquella parte del mundu
y anque paeza que los sos efeutos nun van ser tan fonderos, sí que ye probable
que dé como resultáu unos cambeos sustanzales na nuesa forma de vida anguaño y,
per ende, nos usos económicos. Nun me maxino los asturianos compartiendo’l vasu
sidra y con ello va’l nuesu tradicional alterne
y la economía derivada. El turismu global, en low cost o cruceru nun va
salir ilesu, tampoco la globalización como sistema económicu creo que se caltenga
ensin modificaciones. Tolo rellacionao cola salú va vese dende otru prisma, más nacional ensin dulda.
La incipiente reruralización ye posible que s’acelere, como’l teletrabayu y les
tecnoloxíes de la comunicación.
Tamos ente un gran cambéu, anque nun se sabe haza ónde, pero
esos 250 tosquiladores venios dende Uruguay, en pleno confinamientu, pa
tosquilar la lana de les oveyes españoles son como una alegoría d’un mundu que
ta a puntu de desapaecer.
Raúl Suevos
A 16 díes vencíos de mayu de 2020
Torna al castellán en repdiv.blogspot.com
No comments:
Post a Comment