Les costes de Venezuela, la Tierra Firme, como se conocía en
tiempos de la Corona Española, tien una perbayurosa historia d’invasiones de mayor
o menor fustaxe. Les más sangrines foron les de los pirates en La Guaira, la
puerta de Caraques, para saquexar esta ciudá. La qu’ayeri s’anunció per parte
del gobiernu de Maduro paeciera cola mesma intención si nun fuera porque produz
arrebol.
Más al oeste de La Guaira atopase Puerto Cabello, de siempres
el más importante del país, domináu pol Fuerte de San Felipe, aquel que
perdiera el mozu coronel Simón Bolívar, causando con ello la derrota del
Xeneralísimu Francisco Miranda a quien el mozacu traicionaría pa salvar el so
pelleyu y asina poder siguir el so camín haza la gloria; pero ayeri tampoco
invadieron Puerto Cabello.
Unos años enantes de lo de Bolívar, Miranda, el primer
hispanoamericanu[i], intentara
una invasión en Coro, entá más al oeste y de menor importancia. Nel so primer
intentu, con una flota de tres barcos, perdió dos y algamó colar de milagru nel
Leander, bautizáu col nome del si fiu, pa Trinidad. Dende ellí intentaría una
nueva invasión en Coro, en 1806, cola pretensión d’allevantar una población qu’abandonara
la ciudá enantes del so aportar. Yá nun regresaría a Venezuela hasta que foi
apellidao pola Xunta caraqueña pa ser nomaú Xeneralísimu; entrando ente
aclamaciones en diciembre de 1810 por La Guaira, au lu esperaba el felón
Bolívar.
La invasión d’antieri nun tuvo tanto glamur; de fecho cuasi
nada se sabe sobro’l a dónde, cómo, cuándo y por qué, que son les entrugues
clave de cualquier aición militar que se precie. Nin siquier se conoz si
participó dalguna de les fragates sobrevivientes daquellas construyies por
Navantia y que los sos 42 millones de comisiones son buscaos agora nun xulgáu de
la Plaza de Castilla madrilana.
Queden ochos calavres ensin nidia identificación, una lancha
fondigada, daqué de armamentu llixeru y el barruntu de que se trate de lo qu’en
Colombia se conoz como “falsos positivos”, esto ye, llamar insurxentes a los
calavres d’unos desgraciaos que pasaben pellí o foron eliminaos por otres
razones. Ye posible que, por muncho que grite escontra l’Imperiu Diosdado
Cabello, el númberu dos del réxime, tardemos en conocer los rellabicos desta
operación.
L’asuntu venezolanu paez tar percaliente. Tanta noticia nestos
díes caberos, d’un signu u otru, solo puen ser indicadores de que los díes de
Maduro[ii]
puen tar llegando al so puntu final como dirixente del país. Toos paecen
esperar un movimientu de Vladimir Padrino, el xefe de les Fuercies Armaes
venezolanes y dalguna prensa señala posibles destinos pal esiliu del
presidente. Veremos qué pasa.
Raúl Suevos
A 4 diés vencíos de mayu de 2020
No comments:
Post a Comment