El mundial wahabita

 

Estos años caberos, desgraciadamente, fumos acostumbrandomos a oyer y lleer pallabres como yihadista o salafista. Pallabres rellacionaes col fenómenu del terrorismu islamista pero que nun tienen una connotación inicial terrorista, como se pudiera pensar d’entamu.

El conceutu salafista fai referencia a los salafs, los compañeros del profeta, y tómalos como referencia de pureza vital y relixosa p’aquellos musulmanes que quieran vivir la so relixón con firmeza absoluta. El yihadismu, sicasí, nacíu cola “interpretación” del Llibru y los fechos del profeta, fala del combate interior del fiel p’agradar a Dios, lo que sedría la gran Yihad, y el combate colos infieles pa traelos al únicu Dios, esto ye, la pequeña Yihad, que ye la qu’impera nos campos de batalla dende’l sieglu VII.

Col pasu del tiempu los asuntos de la Fe foron viciándose, ablandándose, esmuciéndose, de forma que a lo llargo y ancho del  mundiu islámicu diben apaeciendo corrientes purificadores que, xeneralmente con ayuda del alfanxe, traíen otra vegada a la corrada a les oveyes escabarriaes, como pudieron comprobar los relaxaos musulmanes de Al-Andalus col aportar d’Almohades y Almorávides, radicales siguidores de les doctrines salafistes y los sos corolarios yihadistes.

Nel sieglu XVIII, nuna Arabia entós ocupada por un sultanatu turcu indulxente con otros pueblos y relixones, y nada rigorista na interpretación del Islam, apaeció un predicador radical de nome Muhamad Ibn Abd Al-Wahhab, que tres aliase y casar a la so fia con un tal Muhamad Ibn Saud, va dar llugar a la saga Saudita que va liderar la independencia d’Arabia nel planu políticu y a la corriente relixosa radical conocía como wahabismu. Alianza qu’anguaño sigue dirixendo’l país y que s’estendió a otros llugares, como’l Qatar que güei llena les pantalles de mediu mundiu.

Qatar ye wahabita, y radical, como la notoriedá del mundial ta poniendo n’evidencia, quiciabes demasiao tarde, pal públicu en xeneral. Ellí, camuflada ente la rellumanza de los petrodólares, tán les caxes de caudales que financien rexímenes radicales y grupos terroristes, como los qu’imperan y asuelen les tierraes del Sahel, la Extremadura d’Europa; tierres d’u van venir nel futuru próximu folades de desesperaos inmigrantes, y zones de combate pa los nuesos soldados anguaño, y muncho más nel futuru.

El mundial de Qatar ye una gran operación de mercadotecnia política de la que nunca va llegar a sabese cuantes voluntaes, y a qué preciu, se mercaron pa la so eleición, pero, más allá de los estadios campanudos y el brillu de los futbolistas, quédense cola realidá. Ye un mundial wahabita qu’empericotia a una dinastía islamista radical. Ye lo qu’hai.

Raúl Suevos

A 21 diés vencíos de payares de 2022

Torna en castellán en repdiv.blogspot.com