Tarantino y la fienda xeneracional

TARANTINO Y LA FIENDA XENERACIONAL

Zarapiqué con Tarantino nel 94, con Pulp Fiction, la so segunda obra tres la nomadísima Reservoir Dogs qu’a min pasareme desapercibida. Per aquel entós esforciabame yo n’estudiar inglés, y hasta creyía qu’entamaba a controlalu; nuna visita a Barcelona descubrí que pasaben la película en versión orixinal nun cine vecín y p’allá que me fui cargáu de infundaes ínfules anglófones.

Salí del cine con dolor de morra de tantu tentar siguir los subtítulos. La única espresión que distinguía nidiamente yera mother fucker, que’l so significáu desconocía pero qu’aportaba a albidrar perfeutamente, y la mio autovaloración respeuto al inglés redimensionóse pa siempres. Dende entoncenes soi mui prudente nesi campu.

Confieso que quedé apoderáu pol espectáculu cinematográficu, nel que me paeció percibir un paradigma nuevu nel tratamientu de la violencia que superaba’l yá aneyu de Sam Peckimpah y que se caltevo como una seña del güei aclamáu direutor, xunto coles bandes sonores. Procuro dende aquel día nun perdeme dala de les sos realizaciones y, de xacíu, vi varies vegaes dalgunes d’elles, aniciando por Reservoir Dogs, anque la qu’encabeza les preferies de mio ye una magnifica y cuasi escaecida Jackie Brown, y de cutio suaño con Salma Hayek y la so culiebra n’Abierto hasta el amanecer, magar esta tarantina pelicula la dirixiere’l mexicanu Robert Rodriguez.

Va unos díes fui a ver, acompañáu d’un fiu trentañeru, Erase una vez en Holywood. Dos hores y picu de cine d’altu nivel que se me pasaron nun soplu. Dos actorazos nel meyor momentu la so carriera con dos papeles que-yos van como aniellu al deu, anque quiciabes el de Di Caprio seya más completu y complexu. El rellatu llaráu de referencies y chisgos de finales los 60, que me llevaben al mio primer cubalibre d’adolescente, retrataba de forma áxil y fresca la industria del cine d’aquellos años, y tamién los fluidos y vapores nos que se sofitaba la creatividá de los grandes nomes. Los siguidores del protagonista de Rawhide, que son lexón, van reviciar descomanadamente.

Hasta equí la crítica de cine pero, al salir de la proyeición y entruga-y al fiu, tamién acérrime de Tarantino, qué-y pareciera, apaeció la sorpresa. “Muy lenta, aburrida, menos mal la escena final”; escena de violencia na que, na mio opinión, el direutor fai una parodia, u homenax, qu’esto nunca nun ta nidio abondo, del so personal tratamientu la violencia.

Unos díes dempués, participé nuna parolada con un ventiañeru anque yá conocíu y llaureáu poeta 

asturianu de más que sólida formación cultural, na que señalaba la so deceición con esta obra de Tarantino, y aducía práuticamente les mesmes razones que’l fiu. Nun la garrara, namái salvaba la escena final.

Les razones pa esta discrepancia son abondo simples. Tarantino llévanos a la década de los 60 pente medies referencies; namái Polansky y Sharon Tate son presentaos direutamente, ensin escaecer el deliciosu homenax a Steve Mcqueen, lo que fai que seya necesaria una cierta edá pa reviciar de personaxes y situaciones, y la xente mozo, na so avasalladora llimitación vital, nun algamen na mayoría les oportunidaes a identificase cola intrahistoria, que ye, posiblemente, lo que más mos lleva a esfrutar a los maduros.

La comunicación, la tresmisión del mensax, del rellatu pa los más cool, ye anguaño la clave de cuasi tolo que mos arrodia y mueve, tamién, de xacíu, nel séptimu arte. Ehí ye u falla esta vegada Tarantino, el so mensax ye nesta oportunidá muncho más ellaboráu y poro, nuna dómina na que primen los mensaxes simples, lapidarios, xeneralmente non constructivos sinon denigrantes de la imaxe del alversariu,  el gran direutor vese faltu de la compresión d’una parte del públicu.

Una estaya del públicu que ye tamién una porción del cuerpu eleutoral, el mesmu que, per cuarta 

vegada en dos años, vase ver llueu llamáu a espresase dempués d’un periodu de bombardéu a base d’eslóganes y mensaxes diseñaos n’oscuros gabinetes de mercadotecnia eleutoral; mensaxes que nun precisen de muncha atención, nin tiempu de reflexón, qu’en dalu casu recuerden el pasáu, nun vaya ser que’l receptor del mesmu se ponga a pensar o inclusive a entrugar. El ciudadanu veceru, el gobiernu representativu ensin representaos.

Tres dos años, y de siguío cuatro eleiciones xenerales, el país nun paez resentise, a lo menos no que la macroeconomía mos diz. ¿Será que somos tan bonos y conducentes que nun precisamos gobiernu? Veremos cómo reaccionen los que nun entendieron a Tarantino.

Raúl Suevos

En Xixón a 22 de septiembre de 2019

Versión en castellán en repdiv.blogspot.com