Al rodiu de Jacques Chirac

AL RODIU DE JACQUES CHIRAC

Morrió Jacques Chirac, antiguu presidente de Francia, y pue paecer estrañu que-y dedique unas llinies pero ye que, dende va yá abondo tiempu, tengo-y un ciñu especial y, tocantes España, particular reconocimientu. Voi tratar d'esplicame.

Zarapiqué con Chirac por casualidá, cuando entamaba a estudiar francés en serio, tiempos nos que namái se contaba con Berliz o'l Assimil, y yera mui difícil exercitar l'oyíu, a lo menos pa los que nun teníemos posibilidá de viaxar a Francia. Atopélu na radio d'onda curtia dando un discursu o daqué paecio, creyo qu'entós yera l'alcalde de París, y de baramonte descubrí una llingua francesa nueva, redonda, vocalizada, intelixible. Oyer a Chirac, pa un primerizu, yera una delicia. Dende entoncenes, siempres que tenía oportunidá, oyíalu con placer.

Chirac foi un paisanu especial, pero un enarca egresáu de la ENA, la Escuela Nacional de l'Alministración que creara De Gaulle. De familia de clas media, llogró dende la carrera de Ciencies polítiques, ingresar na ENA, au se formen los grandes dirixentes franceses dende la so fundación y con independencia de la so filiación política. Macron u Hollande son un exemplu, anque Sarkozy yelo de lo contrario y quiciabes poro intentó cargase la Escuela. No que me toca presumo de tener dao na so see d'Estrasburgu un par de conferencies sobro l'Eurocuerpu.

El casu ye que Chirac, flamante enarca, yá casáu con Bernadette, no que siempres se nomó un braguetazu –que me perdonen les feministes- tocó-y facer el serviciu militar, yeren tiempos de la Guerra d'Arxelia, y pudiendo quedase na capital por posición y familia política, esto ye, enchufáu, marchó como oficial de caballería voluntariu a un puestu avanzáu, u-y tocó a vegaes exercer el mandu y sentir el valir de la institución militar y de la camaradería, y el significáu de los desastres de la guerra, de toles guerres, lo que faría que siempres sofitase con claridá la institución armada del so país. Si vis pacem para bellum.

Tornáu en Francia anicia la so carrera política de la mano de George Pompidou, reconvirtiéndose dende les sos universitaries posiciones comunistoides -ye probable que la so voluntariedá militar se sofitara nun deséu de facese perdonar esos pecaos de mocedá- y averándose a la drecha gaullista, onde faría carrera. Una carrera que, lu llevaría e exercer de ministru, primer ministru, alcalde de Paris y, a lo cabero, presidente de la República demientres dos mandatos.

Nes eleiciones presidenciales aportará a ser el más votáu de la historia de la República magar hai que señalar que competía, en segunda vuelta, escontra Le Pen lo que faría que toa Francia lu votare de forma masiva. La so presidencia viose marcada pola cohabitación col socialista Lionel Jospín, nun asonsañamientu de la qu’él mesmu protagonizara con Miterrand como Presidente, y poles denuncies por pequeñes irregularidaes demientres el so periodu como alcalde de París, polo que sería condergaú una vegada perdida la inmunidá presidencial. Fina la presidencia con cotes perbaxes d’aprobamientu ciudadanu nes encuestes, hasta’l puntu que’l refugu francés en referéndum al proyeutu de Constitución europea dicen que foi una forma de censuralu a elli.

La prensa d’allá siempres se fizo ecu de que a la so muyer-y procuró múltiples protuberancies frontales, asuntu que tantu ella como la propia Francia siempres-y perdonaron, pues ellí, como n’España y nesa dómina, eso yera un detalle d’homía, bon vivant creyo que-y dicen. El so sucesor, Hollande, superaríalu en entrambes materies, los líos amorosos y el refugu final de los franceses.

Yo, sobre too, guardo-y especial reconocimientu porque foi demientres el so mandatu como primer ministru que s’empecipió a piesllar el santuariu d’ETA nel país vecín y la Guardia Civil pudo entamar a trabayar dende ellí d’una forma conducente p’acabar col cáncer de la serpiente. Más tarde, en tiempos d’Aznar, pondríase de perfil nel asuntu de Perejil, lo que llevaría a José Mari a poner los pies enriba la mesa del ranchu de George Bush jr, y al Exércitu español a esplegar nuna pacífica zona hortofrutícola del centru d’Iraq; pero eso son otres histories.

Que descanse en paz Jacques Chirac.

Raúl Suevos

En Xixón a 28 de septiembre de 2019

Versión en castellán en repdiv.blogspot.com