La guerra d’Ucrania, a fuer d’usu, ta camudando n’espertos nel
arte de la guerra a munchu personal, especialmente nes nómines de les tertulies
radiofóniques y televisives, au yá malapenes se ven los especialistes
militares, estos sí, qu’al entamu de la invasión mos esplicaben el desendolcu
de les operaciones.
Nel mio casu, quiciabes por deformación profesional, llévame
a ver situaciones béliques ellí u, seguramente, nun hai más que epresiones
normales de los estremaos y fecundos cuerpos sociales. Y asina atopéme’l sábadu
metanes un congresu anual d’un partíu asturianu, y asturianista, al que fui
invitáu por un de los sos dirixentes, al que agradezo’l detalle, y que me somorguió
nel conflictu ucranianu. Tratábase de Foro Asturias.
La vida política, en xeneral, ye una guerra continua, ensin
final nin aselu, anque afortunadamente pacífica. Los partíos políticos viven
nuna llucha permanente por ganar territoriu, o lo que ye lo mesmo, votantes. Y
p’algamar los sos oxetivos planeen campañes, que suelen coincidir con feches
específiques rellacionaes col calendariu electoral, y asina tenemos les
campañas de les xenerales, les de les autonómiques, o les municipales, qu’en
delles rexones, como’l casu asturianu, coinciden coles anteriores.
Dientro de la planificación d’eses campañes suel producise dalguna
batalla, o más d’una, davezu; anque en munches ocasiones estes batalles son escontra
uno mesmu, esto ye, nun ye l’alversariu quien les conduz sinón los propios
erros o intrigues. Como nel casu de Foro Asturias.
Ayeri nel congresu, celebrao nesi canciu desaforáu al
“grandonismu” asturianu que representa la obra de Calatrava y que los
“carballones” conocen como “el centollu”, nun pude evitar entrar na dinámica
ucraniana al güeyar el cromatismu con que se presentó la señora presidenta,
seguramente pensando nel logu nuevu de la so formación y na bandiera d’Asturies
pero que suponía un cantar a la bandiera d’Ucrania, tan metía na nuesa memoria
ocular dende’l pasáu día 24 de febreru. Y atopé munches semeyances.
Foro Asturias vien de superar una batalla tarrecible nos tiempos
caberos, la d’enterrar al so propiu creador, y nun quiero pensar nos replicantes
de Blade Runner, nacíos con fecha de caducidá. Una batalla qu’a tenor del
sentíu parllamentu de la señora Morillón, con pasaxes al puntu de papuxar,
debió de ser tremendo. Siempre lo ye acabar col proxenitor. Pero hai futuru
tres el duelu.
Foro lleva ventaya en cuantu qu’esta batalla sirve-yos pa,
como Ucrania tres la invasión rusa y los duros meses de resistencia a estazón,
salir reforciaos y llistos pa empeñase en campañes nueves con puxanza renovada,
como los ucranianos tán amosando na ofensiva que lleven a cabu estos díes y que
los lleven a recuperar parte del tarrén perdío. El territoriu que dicen querer
recuperar, nesti casu, ye’l del asturianismu, y, anque nun lo tien fácil, el
campu contrariu nun paez tar nos sos momentos meyores.
Los dos partios grandes tán atollaos nes sos batalles
propies, un descabezáu dende Madrid y l’otru en plenu usu de la daga florentina
nel so bastión xixonés, dalgo que daría ventaya táctica al recuperáu Foro si
nun fuera pola falta d’artillería pesada, los Cesar y los HIMARS suministraos a
los ucranianos y que nesta incruenta campaña política asturiana toma la forma
de presencia nos medios de comunicación, siempres escasa pa los asturianistes.
Tocantes al programa de la formación anotar, ente otros
elementos, el tele-coloquiu tenío con dellos investigadores mozos na diáspora,
con especial mención a Xurde Menéndez, discípulu de López Otín anguaño trabayando
en Dallas y con quien compartí estudios ya nos cursos de la UABRA en Cangues de
Narcea. Toos ellos dan fe del ésitu de la formación universitaria asturiana y, al
tiempu, del fracasu de la rexón pa da-yos continuidá ensin tener qu’abandonala.
Los foristes amosaben el sábadu una voluntá de vencer
descomanda, dalgo que, xunto a la sorpresa y l’acción de conxuntu, conformaban
los vieyos principios del arte de la guerra; toos ellos escasos nel enantes
temíu Exércitu rusu. ¡Slava Ukraini!
Raúl Suevos
A 2 díes vencíos d’ochobre de 2022
No comments:
Post a Comment