Vivimos na sociedá de la información, ye un suponer, un mundiu nel
que les estremaes tecnoloxíes mos procuren una visión supuestamente real de lo que
pasa nel globu. Ye lo que creemos que pasa cola guerra d’Ucrania, de la que mos
llega un torrente d’información que mos avera a la realidá de los combates y al
sufrimientu de les persones que nun algamaron a colar a tiempu de los invasores
rusos.
Nel llau rusu faise más difícil llograr una imaxe de la
realidá, tantu de la vida civil como de lo qu’asocede nel mundiu militar, pos
el control de la información lleváu a cabu pol gobiernu de Vladimir Putin failo
si non imposible sí abondo llendao na
mayoría de los casos, o simplemente manipulao nos demás. Magar ello, dalgunes
noticies, en principiu insignificantes, aportennos unos nicios mui
interesantes.
Va dellos díes trescendió la noticia de que llegara un bote
con dos homes rusos a la islla de San Lorenzo, al sur del estrechu de Bering y
en medio del mar del mesmu nome. Un mar del que podemos facenos idea pente
medies les imáxes d’un programa de televisión abondo conocíu, Pesca radical, nel
que dellos pescadores s’aventuren per un mar casi constantemente embravecíu a
la gueta del tesoru gastronómicu que suponen los centollos reales. Un mar que
nun paez adaptáu a los viaxes turísticos.
La noticia nun especificaba qué mena de bote yera, si de
motor, de vela o a remos, anque la distancia de la población d’u procedíen
superaba les cien milles nautiques. Un llargu y perpeligrosu percorríu pa llibrase
de la movilización militar a la que Putin los sometiera y que-yos otorgaba una
esistencia breve y precaria na lloxana Ucrania.
Razón abondo pa echase al mar y arriesgar la vida nunes agues xélides y
menaciantes.
A min la noticia resultame más gráfica que los datos del
frente de combate y, sobremanera, de los resultaos de la movilización en tol
país, au al paecer producense fregaos colos comisarios de la lleva forciosa, y
onde tamién son amburaes les oficines del ramu en munches provincies. Too ello
mientes los reclutas nuevos van llegando a Ucrania y son únviaos a morrer al
frente ensin malapenes instrucción nin tampocu equipamientu individual.
Les cifres de varones n’edá militar qu’abandonaron el país
superen ampliamente a les de conscriptos puestos a disposición del Exércitu, y
si tán dispuestos a llanzase al Mar de Bering nun bote nun paez que la
situación vaya a meyorar pa Vladimir.
Raúl Suevos
A 16 díes vencíos d’ochobre de 2022
No comments:
Post a Comment