Pa los cinéfilos Lord Jim ye’l títulu d’una película de metanes los 60 que protagoniza Peter O’toole, yá de sonadía pol so Lawrence d’Arabia. La cinta basabase nuna gran novela de Joseph Conrad, el de Nostromo y sobre too, el de En el corazón de les tiniebles, el rellatu perduru qu’inspira la tenebrosa y tarrecible parte final d’Apocalipsis Now, el famosísimu trabayu de Francis Coppola.
Lord Jim cuenta la historia d’un oficial de la marina mercante que, metanes una tempestá y con una vía d’augua, abandona, xunto cola tripulación, el barcu y el pasaxe de pelegrinos a la Meca que teníen baxo la so responsabilidá. Eso asocede al entamu la historia y el restu ye too un camín de remordimientos y esfuerciu por reparar la culpa mediante una vida d’entrega a los demás.
A min viénome Lord Jim a la memoria porque, metanes la tempestá fondera na que mos atopamos, un huracán de tipu mediu que pala seronda menacia con superar la categoría máxima de Saffir-Simpson, el nuesu capitán y la tripulación colaron de vacaciones. Nun hai naide en Madrid, nel puente de mandu, nin gobiernu nin oposición; toos a una, como Fuente Ovexuna, marcharon de vacaciones, ensin güeyar p’atrás, ensin una frase de alliviu o d’esperanza pa los aflixíos que se queden nos camarotes y bodegues.
Col fin del estáu d’alarma la responsabilidá trespasóse a los goberninos autonómicos lo que sirvió pa poner n’evidencia, si entá facía falta, que l’ausencia del enseñamientu de la historia patria nel nuesu –¿nuesos?- sistema educativu llévanos a repetir ensin dala contención aquel estáu de taifes que tan mal resultáu-y diera a la España musulmana. Vemos, llamativamente, qu’aquellos que más reclamu faen a les sos peculiaridaes históriques, vieya corona d’Aragón, vieyu reinu de Navarra y Provincies vascongaes, lleven a tola nación a recibir la tarxeta d’apestaos nel restu d’Europa.
La tripulación del Patna, asina se llamaba’l barcu de Lord Jim, acaba enxuiciada y castigada, pero nel nuesu casu’l asuntu nun paez tan nidio. A Trump llévenlu a xuiciu en payares los sos eleitores pero n’España nun hai tala previsión pol momentu lo que fai que, previsiblemente y gracies al tamién desapaecíu cuartu poder, pa cuando aporte’l momentu de talu supuestu xuiciu otros elementos más actuales van facer que los muertos y el desastre económicu nun seyan tan importantes.
Mentanto’l consumu de les families contraese a pasos aceleraos, cola mesma velocidá que crez l’aforru, lo que da cuenta inmediata del sentir de la ciudadanía. Vien una mui gorda y los del puente marcharon con Lord Jim.
Raúl Suevos
En Xixón a 15 díes vencíos d’agostu de 2020
Torna en castellán en repdiv.blogspot.com
No comments:
Post a Comment