Na mio dómina d’estudiante -yeren otros tiempos- en réxime d’internáu y con una componente física enorme nel día a día, tenía un collaciu que pregonaba como divisa vital que “polvu que nun eches güei nun lo vas echar mañana”, pensamientu que munchos, por nun dicir la totalidá, compartíemos anque nun lo publicitáramos. La edá per un llau, la testosterona desbocada per otru, y per toles esquines la moral dotrín y reprimida d’aquella sociedá facía que toos viviéremos esperando un mañana que maxinábamos más floríu en tolos sentíos.
A la xeneración qu’anguaño-y toca reviciar de la mocedá’l devenir de la patria tamién-y dio una nación na que’l so nivel de llibertaes, magar lo que’l nuesu natural pueblerín mos lleve a pensar en munches ocasiones, ye envidiáu pola mayoría de países de la nuesa redolada. Naide mos da leiciones en cuanto a la dimensión humana de les nueses lleis y lo avanzao de les mesmes en rellación col restu del mundu. Nun paez qu’heba un res de negativu nello.
Per otra parte, al empar que mos amosamos como sociedá mui avanzada nalgunos aspeutos, siguimos calteniendo atavismos que mos devuelven a lo que siempres foron los pueblos que mientres dellos sieglos poblaron la nuesa patria. L’individualismu ye, posiblemente, el rasgu que de forma más duradera tien caracterizao a los españoles d’una esquina a otra de la Península ibérica.
Dicía Salvador de Madariaga, na so magna obra “España”, que’l individualismu fuera a lo llargo del tiempu’l responsable de les mayores fazañes personales y tamién el culpable de la incapacidá del país pa los grandes llogros colectivos. Apuntaba que, particularmente, esi individualismu atopábase detrás del separatismu de dalgunos catalanes y, poro, yera prueba del fonderu españolismu d’esos compatriotes. Munchos sociólogos opinen lo mesmo y tamién lo fai más d’un siquiatra.
Anguaño contamos, dicen, cola xeneración mozo meyor preparada de la historia d’España, afirmación qu’a mim produzme sensaciones encontraes puesto que nella falta, creo, información adicional. ¿Falamos de cultura o namái d’información? Yá que nun me cabe dulda que verdaderamente tamos viviendo precisamente no que llamen sociedá de la información pero, ensin una correuta dixestión de la mesma, con ella nun s’algama la cultura sinon se perfeiciona con ella a la persona, a la so parte moral, al ciudadanu. A esi que, trescaláu del civismu qu’otorga la cultura, va ser llamáu a construyir una nación más preparada, fértil y feliz que la que vivieron los sos padres.
La Pandemia ta descubriendo detalles alarmantes. Per toes partes lleguen noticies d’estudiantes que nun pueden controlar la so necesidá de rellacionase colos sos iguales; fiestes, botellones, alcuentros, etc. too val y en toes partes surden focos d’infeición nuevos que depués, nalgunos casos, lleguen a la familia d’orixe y acaben por algamar, otra vegada, a los nuesos mayores, anque s’abelluguen nes residencies xeriátriques. La edá media d’infeición, qu’a lo llargo del branu baxara descomanadamente, torna a amontar y de nuevo apunta a los vieyos que siguen igualmente desprotexíos énte la infeición y que van volver a ser los más perxudicaos. Los que se supón destinaos a ser el sofitu de la nuesa vieyera deberíen facéselo mirar ¿O ye que tán pol aforru de costes?
Raúl Suevos
En Xixón a 12 díes vencíos de ochobre de 2020
Torna al castellán en repdiv.blogspot.com
No comments:
Post a Comment