Nos 30 años caberos tien esistío una gran esmolición nel Exércitu español pola cuestión antiaérea, esto ye, pola proteición del nuesu territoriu y unidaes militares d’una posible amenaza llegada pol aire. Esta medrana tendría de resultes la dotación de les unidaes militares con una serie de misiles y cañones de baxa, media y alta cota. Ente los primeros el misil portatil Mistral, pa baxa y mui baja cota; y nel otru estremu, la media/alta cota col renomáu misil Patriot, de fabricación norteamericana.
España algamó la modernización d’esta capacidá finalmente allá pel añu 2014 cuando mercó, de segunda mano, una batería d’estos misiles a los nuesos socios alemanes, por una importante cantidá d’euros. Con ello podríamos dicir qu’en Defensa antiaérea pasamos a xugar en primera división.
La Guerra civil de Siria y la dramática apaición del Estáu Islámicu per aquelles tierres supunxo, aparte de los clásicos horrores de la guerra, una serie de reaiciones polítiques ente les cuales cabe anotar la petición de Turquía a los sos socios de la OTAN de sofitu militar en rellación cola defensa del so territoriu; y ellí apaeció pronta al socorru España cola so batería de misiles Patriot. Yera 2017 y dende entós tenemosla esplegada colos sos 170 miembros na base turca d’Incirlik.
Dende aquelles mesmes feches el presidente turcu, señor Erdogán, tiense llanzao, coincidiendo coles sos primeres derrotes electorales internes, a una carriera de intervenciones esternes más o menos direutes, entamando pola propia Siria, au esplegó al so exércitu y ocupó una fastera fronteriza nel interior d’esi país a costa de los antiguos y abandonaos aliaos kurdos de los Estaos Xuníos. Depués los sos intereses centráronse nes augues territoriales de Chipre, ocupada en parte per Turquía dende va dellos años, que se superponen coles más llegales de Grecia y au les tensiones tienen algamao niveles nunca enantes vistos, llegando al puntu de la colisión naval cola propia Francia esplegada per aquellos lares dientro de la misión naval europea. Al tiempu los sos enfotos de potencia rexonal lleváronlu a intervenir en Llibia, y de pasu chocar con Exiptu, con medios materiales y humanos, pente medies esto cabero del usu de mercenarios sirios. Too esto fízolo calteniendo un xuegu d’equilibrios llamativu con Rusia, cola que paez topetar a vegaes y a la que ye a mercar material militar, pa sorpresa de la OTAN.
La so aición cabera vien de la mano de la so intervención nel non tan llonxanu Cáucasu, entá por determinar en qué grau, nel perrecien conflictu ente la católica rexón de Nagorno-Karabaj, sofitada por Armenia, y la so musulmana vecina Azerbaiyán, onde los muertos, que la so cuantía dambos bandos caltienen semioculta pel momentu, paecen ser munchos. Y mentanto España caltien una batería Patriot en Turquía. ¿Hasta cuándo?
Raúl Suevos
En Xixón a 1 día vencío d’ochobre de 2020
Torna en castellán en repdiv.blogspot.com
No comments:
Post a Comment