Coleicionar

Fai un tiempu, allá pel inviernu, el fíu tevo de dir a Roma por trabayu y entrugóme por dalgo que facer na mañana que tenía llibre. Dixi-y que dar una vuelta pol centru, reviciando'l placer de pasiar per Roma, y llueu que fuere a tomar un vasín de rosso de montalcino nuna terracina que ta xusto enfrente del Panteón d'Agripa y ellí qu'esfrutare'l llugar, el tiempu y el momentu.

Llegáu'l día llámame y dízme: Primero que-y habíen llantáu 14 pol vinu, porque s'había enquivocáu y pidiere un brunello de montalcino, que ye muncho meyor y más caru; dempués díxome que casi nun se columbraba'l Panteón del xentiu qu'habia naquella plaza. Roma taba enllena de turistas de tol mundu. Toos facíendose autorretratos colos telefonucos pa manda-ylos llueu a amigos y familiares y a tolos que-yos presta güeyar nel feisbuk, nel instagram y en toles redes sociales que tán de moda anguaño.

Vien esta llarga introducción porque l'otru día, en medio'l puente del Pilar, nun me quedo otra -tenía una visita en casa- que dir hasta la playa de les Catedrales, pernomada nestos últimos tiempos y que ta un pocu p'allá de Ribadeu. Como la marea baxa yera tardiega, llevélos a ver Viavélez, llueu Tapia y dempués a xintar a Castropol. A eso de les cinco tiramos pa la playa. ¡Ay mamina¡ solo con güeyar pa los aparcamientos ya daba mieu. Costómos un cachu atopar au dexar el coche. Enfilamos pa la playa y ya nes escaleres había un atascu ¡aquello paecía'l Sella¡ toos col teléfonu en mano tirando fotos -pa les redes sociales-, toos remuñando porque había muncha xente. Los más raros yeren unos pocos que taben en traxe de bañu, paecíen marcianos naquel llugar. Total, viaxe de placer y descubrimientu pa tol mundo, ye un suponer.

Al tornar pa casa ocurrióseme entrar pa Busto, que ta apocayá, a ver el cabu y l'anochar, que ellí ye de los que te dexen plasmaú, y foi asina, los mios visitantes atoparon un llugar como pocos, con una vista de la mariña asturiana perguapa, ensin apenes xente y amás cola chorra de zarapicar con unos percebeiros a los que-yos mercamos un kilo a un preciu tamién perguapu. Ya me lo devolverán cuando vaya yo a Madrid.

El posu que me queda de too esto ye que nesta dómina acelerada na que vivimos, tenemoslo too al algame de la mano. Viaxar ye perbaratu, nun mos fai falta l'axencia de viaxes, too se pue facer dende casa o'l teléfonu. Los billetes, los hoteles, la información d'au dir, pa la xente mozo, pa los vieyos, too, y en cualquier momentu del día; asina que güei tol mundo ta de viaxe, o pensando en viaxar. Tenemos hasta aplicaciones d'internet pa facenos un mapa con tolos llugares del mundu au tuvimos o pensamos tar. Y el que nun pue viaxar, porque ta malucu, ta nel paru o nun tien perres, entós deprimese porque nun va poder manda-yos fotos a los amigos d'onde ta de viaxe. Esto ye l'acabose.

Y ye l'acabose porque la mayoría de la xente viaxa pa coleicionar sitios, sitios polos que de fechu nun tienen un interés real, ye dalgo pa contar, p'amosar, pa dici-yos a toos que tamos gayoleros porque fuemos a, tuviemos en, tenemos... y cada vegada escaecemosmos más de ser y cada vegada somos más masa, la masa de Ortega, la que se remonta ensin saber y tampocu tien interés en coñocer. Ye la dómina.

Raúl Suevos

Xixón