De la llei a la llei, per aciu de la llei

Esa foi la idea d'un asturianu, Torcuato Fernández Miranda, al que la historia entá nun-y pagó'l tributu que creo-y correspuende, pa pasar d'una manera exemplar, conducente ya indolora, dende un réxime de dictadura, autoritariu o dictablanda -caún pue nomalu como quiera- pero, sicasi, non de gobiernu representativu, a unu ñuevu al que-y dicimos Estáu democráticu de drechu.

Coles Lleis Fundamentales del reinu, entós a valir, conxuntu que podía considerase un cuerpu constitucional, nun había manera de salir del embanzamientu que, hasta la llegada de Suarez al gobiernu, representaba a la perfeición Arias Navarro. Torcuato, coles mesmes Presidente de les Cortes, col puxu del Rei Xuan Carlos y la direición escénica de Suarez, sacó p'alantre la Llei pa la Reforma Política, votada pelos procuradores franquistes, pa pasmu del mundu enteru porque significaba la muerte del réxime, y que daría pie a tolo que vino dempués, incluyendo, poques gracies, la nuesa Constitución d'anguaño, votada mayoritariamente pelos españoles, sobretou en Cataluña.

Ellí empecipió too, como diría Piqué. Con una llei que liquidaba 35 años de réxime, que despesllaba les puertes pa que los españoles tuvieren la oportunidá de gobernase ellos mesmos. De la llei a la llei, per aciu de la llei.

Güei, una parte de la clase política catalana paez que decidiere qu'esi tipu de procesu, el que marca la llei, nun va con ellos. Ellos otorguense'l drechu de saltase la llei, la de toos, la Constitución, la d'ellos, l'Estatutu d'Autonomía y crear un sistema políticu ñuevu; duldosamente democráticu acordies colo que se pudo columbrar nestos últimos díes. De fechu podríemos falar de golpe políticu institucional. Los golpes militares güei son daqué del pasáu.

La opinión pública catalana, y tamién la del restu d'España, nun paezen especialmente preocupaes. Será polos mensaxes que lleguen del gobiernu nacional y tamién del estranxeru, o será por inorancia, anque a min, será pola edá, nun dexa de quitame'l sueñu la situación. Veo munches ñubes nel plazu cortu, nun falemos yá nel mediu y nel llargu.

Los partios institucionales catalanistes, llamolos asína por educación, CiU y ERC, lleven muncho tiempo enllenándose'l papu de declaraciones de exemplaridá pacífica, pa que nun mos esmolezamos, anque lo del Parlamentu catalán del otru día nun tengo mui nidio que mereciere tal calificativu, pero, amás d'ellos, nel contestu actual, tenemos otros protagonistes. Un grupu d'activistes dispuestos a too con tal de llevar la llibertá al pueblu -salióme asina pero recuerdame a daqué que dixo un tal Lenin faz unos 100 años- y de pasu encargase d'alministrala. Estos neñ@s son la CUP, minoritarios n'escaños pero, como se vio, protagonistes de la vida política catalana de los últimos tiempos.

Lleo que tán aportando anarquistes italianos a Barcelona para dar una mano, tamién llegarán del norte los "Black blocs", d'infaustu recuerdu, toos esos y dalgún más a la gueta de la confrontación coles autoridaes establecies, y les sos fuerces d'orden públicu que son les que tienen que pisar la cai. Si pel camin caen dos o tres mártires, meyor que meyor. Preocupame'l mes de setiembre.

Too esto, el yá vieyu marasmu políticu catalán y la posibilidá de disturbios mayores en Barcelona, afeuta a la imaxe del país, creando incertidume y torgando o refugando delles decisiones económiques, esto ye, faciendo más difícil la yá de por sí carranca recuperación de la crisis.

L'Estáu autonómicu, que lleva funcionando más que aceptablemente dende faz yá dellos años, tráxomos llibertá, pero tamién bienestar en munchos aspeutos de la vida de les persones. ¿Ye meyorable? Poques gracies, too ye mejorable, pero'l que tenemos anguaño básase, o basábase, na solidaridá interrexonal y la llealtá institucional. La solidaridá vien poniéndose en custión faz yá tiempu -lo de los Conciertos vascu y navarru a min cuéstame entendelo- y l'espectáculu chornosu que mos vien de dar Cataluña, paezme que se alloña de la llealtá institucional. Quiciabes seya llegáu'l tiempu de revisar los términos del contratu institucional y yá de pasu, tamién el código penal, qu'igual se quedó vieyu.

A 16 de septiembre de 2017