Atopéme esta mañana con un escritu de Gregorio Morán, l'escritor d'orixe asturianu, nel que falaba, ente otres coses, de la figura del Príncipe Aliatar, mensaxeru de los Reyes Magos, y según paez, cargu patrimonial de los Reyes n'Asturies ya que, según él, nun se da n'otres partes d'España.
A min vínome de siguío a la memoria una semeya na que toi yo con cinco o seis añinos más o menos, agarráu pol tal príncipe, con una cara que me recuerda la d'aquel neñin inglés que-y llantaron al llau a Sadan Hussein cuando la Segunda Guerra del Golfu pa facer ver que los occidentales taben bien trataos magar los bombardeos de los americanos. El neñin taba aterrorizáu, como yo col Principe Aliatar.
Nun yera pa menos. El príncipe aportaba unos díes enantes que los Reyes, allá pola primera parte del periodu navidiegu. Nesti casu traxeronlu al Ateneu de la Calzada, en Xixón, onde había un teatrín y ellí, nel escenariu, asitíabenlu sobro un sillón grandón al que-y poníen penriba un sayon bermellu pa que paeciere ainda más imponente.
El Principe, a lo menos el d'esi añu, venía revistíu con unos pantalonones bombachos a la turca de color escuru, camisa blanca con mangues abullonaes, chalecu roxu con pedreries y penriba una capa azulona bien grandona y qu'él estremara a un llau pa que los neños nun-y la triyaren. El conxuntu diba coronáu per un turbantón tamién mui coloríu -en estampáu diría la mio muyer- con dos plumes de avestruz enrriba del too y una piedra de cristal bermellu na parte frontera.
Los neños díbamos faciendo cola pol pasiellu a mandrecha del patiu de butaques. El central yera pal fotografu y el de manzorga pa les madres que mos diben a recoyer dempués del momentu de terror. Yo diba bien guapu. Mio ma vistierame con muncho de procuru, como pal Domingu de Ramos, repeñadín, con un pocoñín de la brillantina de mio pa nel pelo y cola carta pa los Reyes na mano, pos pa los neños esi yera l'oxetivu y pa les madres la foto pa llueu manda-y copia a la güela, que nel mio casu taba n'Ibias, incomunicada tol iviernu y ensin UME que-y abriera'l Puertu'l couño. Yeren otros tiempos.
Entrar entrábemos col ánimu sele, sabíemos a lo que díbemos y les cartes ya sufrieren la censura de les madres pa nun pidir coses que los "reyes" nun se podien permitir. El problema, l'acollonamientu, entamaba metanes el pasiellu cuando te dabes cuenta de que'l Principe yera negru. Sí, yera negru, como un tizón, y anque anguaño daquien pudiere pensar que yo y los mios collacios yeremos xenófobos pequeñucos y precoces, la verdá ye que l'únicu negru que conocíemos yera'l Rey Baltasar, al del Cola-Cao conocíemoslu malpenes d'oílu cantar na radio. Nun había más naquel Xixón.
Pa cuando me tocó subir les escaleres del escenariu díba ya tremeciendo, los lloros enriba, de los que me precedien, yeren xeneralizaos y yo nun me mexare porque siempres fui sinon valiente sí mui vergonzosu y colos pantalonucos cortos hubiere quedao mui feo.
Yá col Principe, y tiesu como un poste, díme cuenta que'l paisanu aquel yera mui raru pos tenía el pelleyu como de betume y el bezu pintáu de bermellu como mio madre los domingos pa dir a misa. Nun-y di muncha importancia, lo mio yera pasa-y la carta y en cuanto-y la dí colé pa les escaleres y los brazos de mio ma como alma que lleva'l diañu. Mio madre, que se debía dar cuenta de lo que pasaba pola mio cabeza, en cuanto que m'algamó, galmió pa la puerta comigo y yo nun güeyé nin una vegada p'atrás por mieu nun me fuere a mirar mal aquel paisanu.
Aporté a casa llorosu y llueu costóme aformigar. Nun bastó que mio madre, como toles nueches d'iviernu, pasare la plancha poles sabanes pa quita-yos la muga, nin tampoco'l ladriyu calecíu sobro la plancha la cocina y forráu con toalles pa poner a los mios pies y axudame a conciliar el suañu. Nun bastaba, el Principe Aliatar tardó en dexame empecipiar a dormir.
Creyo que nun recuperé la tranquilidá hasta Reyes, cuando vi que me traxeron la pistola de restallones con canana que-yos había pedío. Tamién me di cuenta lo llista que yera mio madré que nun me dexara pidir la canana de dos pistoleres porque esa namái-y la trayíen a los neños de familia con perres y la nuesa nun yera d'eses.
En Xixón a 18 d'eneru de 2018
No comments:
Post a Comment