Pensaba yo que colo del “prusés” catalán y lo de la corrupción l’ambiente políticu taba entreteníu abondo, pero vese que la llexislatura, anque nun lo paeza, tien yá un final, y los partíos políticos tán aniciando a aviar les sos estratexes de batalla. Equí n’Asturies dame que mos van tener ocupaos colo de la cooficialidá, ési va ser el Santu Grial de les eleiciones vinientes n’Asturies.
A nivel nacional el “prusés” obligó-yos, a unos y a otros, a amosar les sos cartes y les últimes encuestes, dicen los que saben d’ello, son en parte’l reflexu de lo que pasó y pasa en Cataluña. Agora dos de los partíos más nuevos sosprendenmos con un alcuerdu de conversaciones pa camudar la llei eleutoral; ún d’ellos va entá más lloñe y ya fala de dellos cambeos; paridá nes llistes, votu a los 16, debates obligatorios na televisión y dexar la proporcionalidá del sistema d’Hont pol sistema Saint Lague, que, al paecer, ye más proporcional.
Estos cambeos paez que van nel sentíu d’amontar los niveles democráticos. Cuanto más proporcional seya’l resultáu, más esauta va ser la semeya de les opiniones del país; contra la paridá de xéneru naide se va manifestar –amás ta mui mal visto–, lo de los 16 años ye más discutible anque la xente mozo ye seguro que lo va aplaudir, que los candidatos tengan que se retratar delantre les televisiones nun ye malo y les más contentes son les propies televisiones, qu’ensin dulda poro van trabayar.
El casu ye que a min too eso déxame fríu porque a lo cabero’l mio votu val lo mesmo, esto ye, nun val un res. Nun val un res porque una reforma como ésa sigue ensin tocar les llistes zarraes y a min nun me queda otra que votar a los que digan los xefes de los partíos ensin que yo puea torgar o quitar ún de la llista o aínda más, amestar ún d’otra llista. El sistema de llistes zarraes déxanos a los votantes como tamos agora y la proporcionalidá va siguir dando-yos a los partíos nacionalistes una sobrorrepresentación en rellación colos partíos nacionales más pequeños.
Nos sistemes democráticos les minoríes tienen de ser protexíes. Tamién nel casu de les minoríes de calter exclusivamente políticu, como pasa colos partíos nacionalistes/independentistes. N’España la combinación del sistema proporcional y el distritu eleutoral provincial fai qu’en Cataluña y País Vascu los nacionalistes garren un sacu d’escaños. Esto nun va camudar col sistema Saint Lague.
El sistema alemán ye una bona solución pa estos problemes, el de les llistes y el de la sobrorrepresentación. Ye un sistema mistu, la mayor parte los escaños gánase pol sistema de distritu uninominal, esto ye, en Xixón llúchase per un escañu, o dos, o los que toque, pero caún d’ellos ye uninominal y cada partíu presenta un candidatu, el que más votos saque gana’l escañu. Asina ye como funciona’l asuntu, per exemplu, nel Reinu Xuníu. Otra parte los escaños va nun distritu nacional nel que los partíos puen allugar les sos llistes y asina dar solución y puestu a los homes y muyeres de les estructures de cada partíu.
Esti sistema daríamos una bona solución pos exposiga la representatividá, caún de nós tendríamos el diputáu de nueso, el del nuesu distritu, elexíu pela mayoría, y los partíos tendríen el cupu proporcional de lo que yos correspondería del distritu nacional. La posibilidá, a vegaes necesidá, de que los partíos nacionales tengan que sofitase nos partíos nacionalistes vese asina amenorgada.
Sicasí, lo más probable ye que nos meses vinientes vamos discutir abondo sobro la llei eleutoral y, equi n’Asturies, tamién sobro la cooficialidá, ensin que tea mui nidio que vayamos aportar a nenguna parte y, mientes, la desapaición de la industria, minería, astilleros, etcétera, l’aveyecimientu de la población, el despoblamientu del mediu rural, les pensiones –o’l cómo pagales–, la emigración de la xente mozo, cuantimás los universitarios, y otros cuantos asuntos qu’afeuten al güei y al mañana, d’ello nun se va falar, nun seya que faga falta dar esplicaciones.
Febreru 2018
No comments:
Post a Comment