Nicaragua tien una historia abondo complicada, sobre manera nel sieglu XX. Dende que los Estaos Xuníos s’apropiaron de los estaos mexicanos del Norte, ent’ellos California, y l’apaición del oro nesti caberu territoriu, too foron problemes pa los vecinos iberoamericanos.
Par dir a California lo más barato yera garrar el camín nuna caravana, como aquelles de les pelicules, pero yera llargu y peligrosu. De siguío atoparon la solución de baxar en barcu hasta’l istmu, cruzar en tren –tren que ficieron los americanos– y llueu otru barcu hasta California.
Dempués diéronse cuenta que yera un bon negociu cargar el tren y los barcos vacíos con fruta –sobretoo bananes– y vendela nes ciudaes nortamericanes. Lo viniente fo la compra de tierres en toa Centroamérica y la United Fruit Company. Los de la compañía poníen y quitaben gobiernos como’l que cambia de xardineru.
Pa los años 30 en Nicaragua les coses taben abondo mal. D’un llau la oligarquía terrateniente, del otru, los demás, pasando fame. Nes Segovies, que ye una zona montañosa del centru del país, levántase César Augusto Sandino. De familia humilde va volvese un caudillu formidable qu’acorrala les tropes del gobiernu y tamién los marines nortamericanos. Tien de secretariu a un tal Farabundo Martí, que tamién va facer historia nel Salvador hasta que lu maten. Sandino va cayer ametralláu nuna trampa d’Anastasio Somoza. Va quedar la so memoria.
Dempués siguieron 30 años de dictadura de Somoza y los sos fíos, hasta que se levanta n’armes el Frente Sandinista, que va aportar a valtálos del poder. Na tiesta del Frente andaba Daniel Ortega y otros comandantes, ent’ellos Ramírez, el premiu “Cervantes” desti añu. El nome del movimientu, nun fai falta dicilo, punxéronlu n’honor de César Augusto Sandino.
De primeres los sandinistes, con Ortega na tiesta, ganaron les eleiciones y gobernaron, dempúes vieno la Contra, y más tarde aportó al gobiernu Violeta Chamorro, esto ye, pluralismu y alternancia, pero, fai unos doce años, un Daniel Ortega nuevu, ocupó’l gobiernu. Esta vegada, cola axuda del Petrocaribe de Chávez, paecía que Nicaragua diba tirar p’alantre, pero non; el discursu yera’l mesmu de Cuba, Venezuela, y un pocoñín como l’Ecuador de Correa o la Bolivia d’Evo, ye dicir,
controlar la prensa, someter los xueces, el poder eleitoral y les fuercies armaes al serviciu del gobiernu. El resultáu ye una Nicaragua pobre de solemnidá, ensin oposición política, la muyer d’Ortega xefe de gobiernu, cambéu de constitución p’adaptala a les necesidaes de la familia. En fin, un panorama ya conocíu.
Fai unos años Ortega sacó de la manga un proyeutu de Canal interoceánicu, de la mano d’una empresa china. Yera invidable, pero sirvió pa espropiar tierres a mansalva y desplazar comunidaes indixenes. El descontentu yera yá manifiestu y xeneralizáu.
Cola desapaición de Chávez y la caída del preciu del petróleo les coses camudaron a peor. El petróleo de Petrocaribe, muy baratu y a pagar a venti años, empecipió a amenorgar, güei yá nun aporta. La economía nicaragüense ta polos suelos y namái faltaba una reforma fiscal pa pone-y les coses aínda más dures a la xente.
Taba cantáo. La xente echóse a la calle y la policía contestó con escopetes. Van venticinco muertos y milenta feríos. Ortega echa-y la culpa a la oligarquía y a los americanos, pero en Nicaragua ya nun queda oligarquía –a lo menos organizada– y los americanos tán a otra cosa, nun-yos importa un res la Nicaragua d’anguaño.
A Ortega namái-y queden dos caminos, camudar de política o enrocase como’l Maduro de Venezuela. Vamos ver qué ye lo que pasa, pero nun me paez que Sandino diba dicir un res de bon de
les politiques d'Ortega.
En Xixón a 1 de mayu de 2018
No comments:
Post a Comment