A daquien yá-y tocó la llotería

Un sábadu pasáu tuvo llugar en Madrid una manifestación d’estremeños. Milenta d’ellos, encabezaos pol presidene de la comunidá, que diba acompañáu pol so antecesor, d’otru partíu. Al paecer echen más de cinco hores pa dir a Madrid en tren, y les víes son mui vieyes. Probinos... Y ye que les comunicaciones son ún de los elementos que más puen influyir nel progresu de los países.

Asturies dende siempres fue con retrasu nesti ámbitu. Los romanos metiéron-yos mano a los astures entrando pel Camín de La Mesa, que llueu ficieron vía menor, esto ye, pa caballeríes, la buena llegaba sólo hasta Astorga. El mesmu camín qu’usaron los musulmanes y el mesmu qu’usaron milenta viaxeros hasta'l sieglu XIX.

Hai unos díes salió na televisión l’alcalde de Huesca anunciando que, posiblemente, l’Exercitu va treslladar el cuartel xeneral del mandu de les fuercies llixeres a la ciudá. Si esto se produz –nun creyo que l’alcalde vaya tirase a la piscina ensin saber si tien agua–, a la ciudá, de 45000 habitantes, va caye-y la llotería en forma de 500 puestos de trabayu. Esti cuartel xeneral –lo qu’enantes yera una división– ye del que depende la Brigada Aerotresportable, na que s'encuadra’l nuesu Reximientu del Principe n.º 3. Asina que cuando’l coronel vaya dir al cuartel xeneral yá nun va dir a Madrid, va dir a Huesca.

Les coses nun asoceden por casualidá. Huesca tien un cuartel vacíu, el Sancho Ramírez, au tuvo la Brigada de Alta Montaña mientres munchos años, hasta que la desaniciaron hai dos. Pero Huesca ta a dos hores y diez minutos de Madrid en tren, y los 380 km de autovía fáense en poco más de cuatro hores. Pa Valencia tien l’autovía “Mudéjar”. L’autovía a Pamplona y Lérida ta a puntu d’acabase y la vía rápida pa Francia tamién ta previsto camudala pa autovía. Huesca nun tien puertu, pero tien aeropuertu, el de Monflorite, un d’aquellos que se ficieron per toa España nos tiempos en que, pensábemos, teníemos perres. Huesca ta mui bien comunicada.

Les coses nun asoceden por casualidá. Huesca ye más grande qu’Asturies en superficie pero muncho más pequeña en población, doscientos y pico mil; pero dende que se meyoraron les sos comunicaciones, paróse l’amenorgamientu y agora ya se fala de crecimientu. Si Francia se pon a trabayar y se completa l’exe mediterraneu, les coses van pintar mui bien pa esta provincia. Comunicaciones otra vegada.

A min cayóme nes manes el “Mio Cid” cuando estudiaba internu nel Loyola d’Uviéu –¡Sí! Naquellos tiempos matábamos el tiempu leendo– y en aportando al episodiu de la xura de Santa Gadea, cuando’l Cid-y diz al rei: “Villanos te maten, rei, villanos, que non fidalgos, de las Asturias de Oviedo, que non sean castellanos”, quedé tan ablayáu que nun pude siguir col llibru. Colé nel momentu pal “Romancero Gitano”, de Federico García Lorca, muncho más suxerente y curiosu pa un bachiller naquellos tiempos de “La vida sale al encuentro” de José Luis Martín Vigil.

El casu ye que, pasaos los años, y pudiendo pensar n’otres coses que nun fuera’l tigre al que tábemos encadenaos tolos adolescentes naquella dómina, dime cuenta de qu’Asturies, p’aquel autor anónimu del Mio Cid, taba yá torgada tres los montes, escaecida de Dios y del poder políticu, en manes de obispos y nobles, toos ellos señores de forca y cuchiellu. Asturies yera lo peor qu’había nos reinos cristianos, yera yá desconocida, casi como agora.

Les comunicaciones son les venes peles que cierre la sangre de los países. España tien una estremidá 
a puntu pa secase, pola falta de riegu y l’escesu de colesterol. La rampa’l Payares inauguróse nel 84...
 del sieglu XIX, y ehí sigue colos sos 64 túneles ente Busdongo y Puente los Fierros, dando serviciu y aguardando que la pesadilla del AVE acabe dalgún día. Nel llau de les carreteres nun tamos meyor, la nacional, coles sos rampes del 17%, sigue siendo un matacamiones y l’autopista del Huerna llevámosla pagando, y bien, dende hai yá trenta años. Les posibilidaes del avión tán aínda por desendolcar, sobre too nel iviernu. Ye difícil qu’una rexón tire p’alantre con estes comunicaciones; y si nun hai desendolcu, a la xente mozo, por mui preparada que tea, nun-y queda otra que la emigración. Tamos como siempres.
1 d'avientu de 2017