La rempuesta al enguedeyu catalán ye difícil abondo pero'l xefe del estáu, el Rey, casi epigramáticu nel so discursu, dexólo perclaro a mio entender, fiat iustitia ruat caelum, que bien a dicir que hai que facer xusticia anque se funda el cielu. Y supongo que'l gobiernu tarde o tempranu empecipiará a mete-yos mano. Nun-y queda otra. Dempués ya dialogaremos.
Aparte de lo de la xusticia, munches coses precisen d'un arreglu. Nel mundu de la comunicación fálase d'información, contrainformación, desinformación, intoxicación informativa, propaganda, etc. y nesti aruelu catalán, como ye'l casu tamien d'otres rexones de'España, hai de too eso y más, y eso nun lo puede iguar la Audiencia nacional.
La batalla de la comunicación, hasta güei, tienenla ganada los separatistes. Un amigu de mio, paisanu con formación escelente, taba espantáu cola violencia de la policía'l día del referéndum. 800 ferios, 2 hospitalizaos por infartu y los demás mancaos. Una muyer colos deos d'una mano rotos que llueu foi un deu inflamáu. L'alcaldesa de Barcelona acusando de violencies sesuales, sedría porque a mas d'una-y metieron mano pa sacala fuera, poques gracies. Muncha xente trago'l sapu.
El casu ye que, poner un muru de xente delantre la policía pa qu'esta nun faga lo que-y ordenare el xuez, esto ye violencia, pasiva pero violencia. La violencia mas grave porque nel estáu de drechu l'únicu que tien capacidá legal pa usar la violencia ye l'estáu; proporcional, pero violencia y lo que se taba preparando, como se puede ver, yera un golpe contra l'estáu.
Dicía l'otru día Albert Boadella que'l golpe de Tejero preparárase n'un mes y mediu, y qu'esti habíase puestu a puntu en trenta y cinco años. Son los años que se lleva adoctrinando nuna historia de fechos falsos, de axudica-y tolo malo a Madrid/España y tolo bono y lo bono por venir al gobiernu catalán. A Pujol, l'home exemplar de familia exemplar, y los sos collacios.
Esti adoctrinamientu, que ye'l mesmu de les sectes relixoses, nun se quita con un decretu, fará falta, polo menos, el mesmu tiempu, dos xeneraciones. Si los gobiernos democráticos, toos, güeyaron pa otru llau mientres se facien llibros enllenos de medies verdaes, o mentires completes, sin nun acudieron a inspeccionar cuando les families, dalgunes, denunciaben que-yos taben adoctrinando a los fios, agora, too eso, con paciencia, habrá que dai la vuelta, si non, dentro unos años taremos na mesma. Mentanto, fiat iustitia ruat caelum.
A 7 d'ochobre de 2017
No comments:
Post a Comment