Hai dellos díes, los radicales de la CUP, los separatistes más rabiaos ente los separatistes catalanes, espublizaron un documentu programáticu pa los tiempos por venir, dando por fechu, poques gracies, la república catalana. Nesti papel, amás d'otres coses, amosabense escontra la UE, la OTAN y l'exércitu europeu. Lo cabero chocóme muncho porqu'esti exércitu entovía nun anició, pero vése qu'a ellos preocupa-yos abondo.
L'asuntu de la defensa, na Unión Europea, foi siempres una cosa de dexar pa otru día, como si nun corriere priesa, como si fuere responsabilidá d'otros, de la OTAN, per casu. Nel 1950, cuando s'empecipiaba a construyir la Europa d'anguaño, pusierase en pie la CED, la Comunidá Europea de la Defensa, un proyeutu perguapu y peradelantáu -güei ainda sedría modernu- pero los franceses nun taben pel llabor de que los alemanes se rearmaren y asina'l proyeutu esbayóse y la defensa d'Europa quedó neles manes de la OTAN.
La UE, nos años caberos, foi desendolcando delles politiques nel ámbitu de la defensa y dende los tiempos de Xavier Solana como Secretariu Xeneral tenemos delles iniciatives y tamién delles misiones europees, de tipu y entidá desemeyaos. Comoquier, fasta fai bien poco, a los güeyos del mundu, paecía que la UE nun tenía l'enfotu d'emplegase a xeitu, estremábase de les misiones más peligroses y dexaba-yles pa la OTAN o pa los norteamericanos. Al tiempu, los presupuestos de defensa de los países europeos amenorgabense d'añu en añu.
Un politicu de hai yá dalgunos años dixo, en frase mui pernomada dempués, qu'Europa yera un xigante económicu, un nanu políticu y un viérbene militar, y si no político medró abondo nestos años, no militar siguimos nes mesmes traces.
Nos tiempos caberos, sicasí, asocedierón tamién otres coses. Del llau rusu, Putin, que no-y debíen prestar muncho los avances de la OTAN nos antigos países del Pactu de Varsovia, empecipió a emburriar nel Cáucasu, como se ve en Xeorxa, Trandsnistria o Osetia del Sur, y dempúes en Crimea y Ucrania; pero en Bruseles siguíen pensando que yera cosa de la OTAN. Entós, casi al empar, aportaron el Brexit y Trump, y la manera de ver les coses entamó a camudar cuasi d'un día per otru. Europa yá nun podía confiar nos socios de tola vida, Europa pescanció que tenía que ponese les piles y dexar de ser un nanu militar.
L'añu pasáu, la señora Mogherini, que ye la que tien güei la siella de Solana, asoleyó la Estratexa Global Europea, na qu'ainda nun se fala d'Exércitu europeu pero que ya cuenta con delles midíes especifiques pa facer coses que vayan más lloñe de los papeles. Hai un par de meses, el 12 de setiembre, el señor Juncker, presidente de la Comisión, fizo nel Parllamentu d'Estrasburgu'l so discursu sobro l'estaú de la Unión nel que, amás d'otres coses, fixase l'oxetivu d'una defensa europea pa enantes del 2025. Dalgunos díes dempués, el presidente francés, Macron, mozu y con delles idees pernidies sobro Europa, tamién asoleyó'l so y tamién ta por una defensa europea. Faltaba la señora Merkel, qu'andaba d'eleiciones, y victoriosa otra vegada, tamién s'asitia por una defensa europea. El mes que vien, nel Conseyu europeu, unos cuantos países, ente ellos España, van constituyise en Cooperación Reforzada Permanente en materia de defensa, esto ye, una asociación más fonda dientro de la Unión pa facer una Europa de la defensa creyible y conducente que mos permita d'una vegada dexar de ser un viérbene militar. Y asina, amás de dar una mano pa que los drechos humanos y el estáu de drechu se desendolquen naquelles estayes del mundu que mos lo pidan, tamién les nueses capacidaes civiles van tener la posibilidá de trabayar con seguridá y eficacia.
Non too ye tan guapo como paez d'estes llínees. Al tiempu que se trabaya na construcción d'una Europa más potente, xunida y segura, los populismos y nacionalismos, como ye'l casu catalán, o les derives de Polonia, Bulgaria, Austria y otros países suponen una amenaza que nun podemos nin debemos refugar nin contemplar porque nel mundu que vien, les grandes potencies, van reblagar penriba de los que nun tean al mesmu altor.
En Xixón a 1 de payares de 2017
No comments:
Post a Comment