Pasada ensin pena nin gloria la comparecencia del Xefe de Gobiernu énte’l Congresu de Diputaos torna a asaltamos el yá fadiu problema catalán. Falta entá un mes pal cansu referéndum y tengo duldes si vamos ser a aguantar el bombardéu informativu que mos espera.
Güei la noticia yera, según el Periódico, que los Mossos y el Govern teníen noticia, per aciu la CIA, de la posibilidá d’atentaos nas Ramblas. La operación d’imaxe del cuerpu policial lleva díes que pierde rellumu y, si esto se confirmara, ellos y el so Gobiernu autonómicu nun van quedar en mui buen llugar. Nun se esperen, sicasi, dimisiones, y los muertos tampoco les van pedir.
Ye una pena reparar cómo la rexón cabecera del nuesu país, en munchos aspeutos, pierde’l tiempu y les enerxíes n’oxetivos políticos del sieglu XIX qu’anguaño ni Pi i Margall secundaría, perdiendo la oportunidá de liderar una España más y más europea, pos ellí, n’Europa, ye au debe tar el nuesu futuru, y si nun ye asina, nun va haber futuru. Tampoco pa Cataluña.
Equí, nel paraísu asturianu, nun tenemos esos problemes, dexando de llau dellos folklóricos soberanistes, la población paez mayoritariamente afacese nesi tradicional cuadonguismu que mos pon a salvo de problemes identitarios, que mos caltien aisllaos –aisllamientu que nun va resolver l’AVE– nel nuesu Sangri La, aformigaos cola sidra y la folixa del branu, y esperanzaos con un cambeu climáticu que mos camude nun ñuevu El Dorado turísticu, pensando que les pensiones de los nuesos mayores son infinites y qu’algún día daquién vendrá –que nun va venir– a iguar los problemes que nós nun fuimos quien d’arreglar.
Nun veo nengún Jovino na redolada y nun sé si’l nuesu cuandonguismu va bastar pa que’l paraísu asturianu lo siga siendo per munchu tiempu. Sicasi, esto paezme meyor qu’aquello.
En Xixón a 4 setiembre 2017
No comments:
Post a Comment