Un mineru golfista

 

Cuntábame un mineru va un tiempo, lo mal que lo pasara cuando lu prexubilaron de La Camocha y como tevo dando varaes a los matos hasta qu’atopó’l guá de los ingleses; que nun ye como aquello de meter la boluca nun furacu en tierra como cuando yeremos neños, esto ye lo de Severiano Ballesteros, ye dicir, el golf.

Col gua xugabemos con unes boluques, pibitines les llamen pela parte Sieru, qu’al entamu yeren de barru cocíu, dempués, nun sé si col Plan de estabilización porque daquella nun tenía edá pa entérame d’eses coses, camudamoles por unes mui guapines de cristal de colores que yeren más cares y tamién, como pasa con tolos materiales téunicos nuevos, esixíen más procuru a la hora d’allugales ente l’índiz y el pulgar (xestu cola mano). Cuando xugabes les tos boles tamién te dolía más el perder. Podía ser la ruina hasta qu’aforrabes pa mercar otres.

Dicíame Pin, qu’asina se llama esti mineru, cuando te falen los del sindicatu de la prexubilación too son cancios, y si vas pregunta-y a ún que yá ta nello va dicite lo bono que ye tener tol tiempu pa ti, pero la hestoria ye bien diversable, y si nun atopes daqué pa pasar el día vas acabar con problemes sicolóxicos (indiz a la sien).

Pa entamar, yá de primeres, daste cuenta que pa la muyer yes un mueble nuevu en medio la casa, y que nun sabe au te llantar; asina que lo primero que te diz ye que nun te quier ver tiráu en sofá, que la pones ñerviosa; si t’ofreces pa cocinar, nin pensalo siquier, que-y dexes la cocina en perdición y sal-y más barato cocínalo too ella; tampoco se pue pensar en dir apiancar con ella pa caltener la forma porque yá tien les sos amigues pa dir a la senda’l colesterol, ye dicir, al Muru. Lo de dir con ella a mercar ¡nin se t’ocurra¡ que eso ye de vieyos vieyos y ella ye aínda mui nueva; si tú te prexubilaste ye problema tuyu qu’ella taba mui bien como taba. ¡Tas xingaú¡

Con estes, andaba yo tirando con una güertina qu’alquilé pa la parte Cefontes, con cuatro lechugues, tres saquinos de pataques, unes poques fabes y daqué de tomate, pero como nun me bastaba entamé a dir dar una vueltina pola senda fluvial, y eso que cada vegada que llegaba al altor de da-y una güeyada al pozu la mina dábame mala gana, pero nesti camín vas atopando xente y nuna d’eses fui zarapicar en Viesques con esi mineru más vieyu, con varios años yá fuera la mina, prexubiláu como yo.

Tres de los saludos conté-y como andaba d’amurniáu y díxome:

.-Voi date la solución, ho. A min pasóme lo mesmo hasta que di col golf. El golf ye la meyor solución pal to problema; camines, faes coordinación, que ye muncho bono pa prevenir l’Alzheimer, y conoces un sacu xente.

.-¡Cagüen ros¡ y díxe yo, pero eso dempués de trabayar na mina paezme una mariconada.

.-Que nun t’oigan dicir eso que ye homofóbicu, retrucóme.

.-¿y eso d’homofóbicu qué ye? Torné-y a entrugar.

.-nun los tragar, m’esplico’l paisanu. Amás de xugar al golf deprendes munches coses ellí enriba demientres vas charrando pel campu.

El casu ye que me convenció, a lo menos pa dir probar, y ye asina que tres d’un cursín y unos cuantos calderaos de boles tiraes –esto ye, golpiaes col fierru correspondiente- anicié a salir al campu La Llorea, ellí u va unos cuantos años pacíen les vaques de la granxa de la Llaboral; y anguaño toi totalmente enganchaú a eso de meter la bolina nel guá, pero estilo inglés, y a costa d’abandonar la güerta y tener la muyer anoxada porque diz que tamién la tengo a ella dexada y nun se falar d’otra cosa que del golf. Asina que voi intentar esplicavos que ye eso del golf.  

Anicia’l maestru nel cursu, qu’equi nómase profesor, cola postura fundamental y ponte col culu en pompa, bien sacáu pa fuera, los reñiles bien metios y los brazos cayíos muertos delantre ti, lo que te da un pocoñín que pensar y alcuerdeste de lo de la mariconada, pero nun rechistes porque al llau tienes una muyer guerriando colo mesmo y anque a ella queda-y mui bien lo del coloque nun vas ser tú el qu’abras la boca y pases d’homofóbicu a machista, que güei por un res llántente un pallabru en llombu y acabes señaláu (postura fundamental). Dempués echa un tiempu pa desplicate como tienes que garrar el gabiochu, ¡perdón¡ el fierru; tamos yá un ratín de lección y entá nun dimos un guelpe pero yá entamamos a sudar, porque esto de concentrase, que ye la matraca del maestru, ye mui tirante y a min yá, pa entós, cántame’l sobacu.

Lo viniente, dend’esa posición fundamental, ye la xuba, esto ye, llevar el fierru atrás y a lo cimero, que ye un sacu difícil y que tamién lo llamen el xiru, porque a la baxada van nomalo’l desxiru, y garraes les dos partes a la vegada date’l pernomáu swing, que yo, enantes de meteme nestes xeres, creía de tola vida que yera una dancia de los americanos, y agora vengo a guipar que ye’l secretu del santu grial golfísticu, y cuesta  cuasi’l mesmu trabayu dar con él.

El casu ye que, según diz el maestru, yá sabemos facer el swing y poro va tenenos, a la media docenuca de paisanos y muyeres que tamos nel cursín, otra media hora faciendo’l movimientu nel aire, esto ye, ensin bola, qu’asina se llama, y yá mos refalagó na más entamar el cursu que nomala pelota ye de mazcayos y ta mui mal visto. Ye una bola y nun se fale más, anque nós siguimos ehí, dando-y al aire.  

Enantes de marchar vien d’ún en ún y déxamos da-y a un par de boles, na más, que nun quier que mos deprimamos y, de fechu, al día viniente falta ún de los paisanos y el restu aprovechamos pa danos pistu falando del pocu esfotu que tien la xente anguaño ¡hai que ver, ho¡

Pa danos moral trabayamos tamién el put, que se diz pat, y que ye esi fierrín  que s’usa pa puxar la bola cuando ya tas cerca’l gua, nesa parte con yerbina mui cortadina y aplanada que paez una alfombra verde de lo guapo que ta. Esa parte nómase green, que se pronuncia grin y quier dicir verde, asina de cenciello. Y, una vegada que mos esplica la postura, que pa esto ye estremada de la del swing,  y lo del xuegu de costazos, aniciamos a prauticar, y bien ceo mos damos cuenta qu’eso ye muncho más difícil de lo que paez na televisión. El furacu ye pequeñu en forma, y el suelu, que paecía planu, resulta que tien “cayíes”; cayíes qu’hai que güeyar, y elles nun se dexen ver; estudiar, y si nun se ven ye mui difícil estudiar; y decidir el camín per au quies que vaya la bola, y dempués la bola nun t’obedez. Una velea.

Lo del put ye tan dificil que ún de los collacios cabréase como un monu, tira’l fierru al suelu –llueu arrepientese y dáilo en manu al maestru- y diz que lo dexa, qu’esto del golf ye pa xente mozo y qu’él yá nun tien edá pa estes xeres. Yo nun digo nada, y eso que’l paisanu ye un cachu más nuevu que yo, pero yo nun soi de dexar les coses a medies, y, amás, soi a meter dalgunes boles nel gua, lo que me da muncha moral.

El casu ye que pa quita-y fierro al asuntu, o pone-ylo, según cómo se mire, el maestru esplícanos que lo normal ye que los greens tean defendios con delles bandes de sable alredor pa enzancar la entrada demasiao fácil al green; bandes que se nomen bunker, pronunciao banker, y que nun pasa nada n’Asturies por llamales sablera. Nun ta previsto nel cursu trabayar esos güelpes, que tienen la so personalidá y tiempu dempués, yá metío a xugador, dóime cuenta que la verdá yera que’l maestru nun quería quedase ensin escolinos, porque lo del banker, más que dificultá, ye una pelgarada.

El casu ye qu’esi día, quiciabes pa nun mos meter más presión, dedicóse a la teoría los fierros que, dexando’l put de llau, dividense en dos clases, los fierros y les maderes; estes caberes nomense asina porque va unos años yeren de madera pero güei d’eso namás-yos queda’l nome. Toos ellos van numberaos, del ún al nueve y cuantu más númberu menos distancia va garrar la bola; dempués del nueve vienen dos más qu’en llugar de númberu tienen nome, el pitch y el sand, que s’usen pa distancies mui curties, cuando tas averáu al green, y pa sacar la bola del armadixu la sablera. La diferencia ent’ellos ta nel llargor del mangu y l’enclin de la cara la cabeza’l fierru. Esto ye, el sand ye’l fierru col mangu más curtiu y con más angulu na cara, hasta 60º. Al contrario, el númberu ún, que sería una madera y tien nome propiu, el driver, draiver, anque munchos xugadores tiren pola cai d’enmedio y llamenlu cabezón, tien el mangu más llargu de toos y lo normal ye que tengan 10º na cara, pero hai profesionales que lleguen a usar draivers con namái 7º, como ye’l casu d’esi guaḥon vascu que se llama Jon Rham. Yo con 11.5º voi contentu abondo.    

Yá más apanguaos, tuvimos un par de díes tirando boles nel campín de práutiques ,que tien techu y too porqu’equí n’Asturies ye daqué mui necesario. D’ún en ún llevábanos a la casa del club au tienen una habitación con unes redes colgaes, pa nun facer un estropiciu coles boles, y espeyos delantre y al to costau. Ye pa que te veas y pa que’l maestru te faiga les correiciones necesaries na postura. A min sígueme chocando lo de poner el culu en pompa pero ye lo qu’hai.

La penúltima clas ye teórica. Ye pa falar de les riegles del golf, les de cortesía, qu’hai munches, y sobretoo les de xuegu, que son cuasi tantes como les del carné de conducir. Valga dicir que puedes xugar solu o acompañáu, hasta cuatro xugadores; siempres va pega-y a la bola el que la tien más atrás y, como al entamu piérdense munches,  pases un sacu tiempu buscando peles sebes y los ablanos la to bola, que cuasi nunca vas atopar, pero pañes otres y quedes tan contentu.

La clas cabera trátase de salir a xugar al campu profesor y escolinos. Quedamos solo tres de los qu’aniciamos porque hebo otru que s’echó p’atrás porque dicía que yera mui caro comprar un xuegu fierros y un carru pa llevalos. A min nun me salío tan caro, comprelos de segunda mano por internet por menos de lo que gasto n’alternar una selmana de branu. Les dos muyeres que quedaben debieron gastar más porque lo d’elles paecía nuevino y de ropa diben como pa un desfile. Pero meyor nun entrar nesos asuntos que pue resultar peligrosu.

D’esta clas cabera lo más importante tocantes a lo físico ye que te das cuenta que nun ye lo mesmo da-y a la bola enriba una moqueta, como nes práutiques, que da-y sobro la yerba’l campu. Pa unos ye más difícil y pa otros más fácil, ye cosa de tiempu y de animáse a salir al campu a xugar. Dempués ta la parte la moral; ye mui importante nun te venir abaxo cuando en llugar de da-y a la bola das en suelu y pégate un retemblón en tol brazu que pienses que rompiste daqué. O cuando la bola en llugar de dir p’alantre tira pa un llau y acaba nuna viesca fuera’l campu. A nós nun mos fo mal, nun se mos escapó’l fierru les manes al dar un güelpe, nin tampoco dimos nel aire en llugar de dar a la bola, que son coses que pasen al entamu y llévense muncho mal pel llau del protagonista. El maestru taba abondo contentu colos nuesos resultaos y declarómos xugadores de golf.

Lo que queda de contavos ye lo más interesante en rellación cola situación mental na que taba enantes de meteme a estes xeres. Había pensao guetar un coach, pronunciase paecío a cuchu pero nun tien nada que ver cola cuadra; ye esi oficiu ente medies de sicólogu y confesor que, ye un suponer, ta en condiciones de subite la moral y dicite como tienes que conducite nes coses que te preocupen. Cobren, polo que sé, más qu’una visita a los Vegas n’Uviéu, y si nun hai resultaos nun ye culpa d’ellos, yes tú que nun faes les coses como te dicen o yes un taráu que nun t’adautes.

El casu ye que col golf tornes tolos díes pa casa cola moral alta enforma, porque una de les carauterístiques d’esti negociu ye la perceición de les coses que tienen los xugadores de golf. Pegues un guelpe malu, d’esos que la bola marcha pa la otra cai –asina se noma la zona per au va xugando una partida- per onde xueguen otros y tienes un collaciu que te diz “desvióse un pocoñín, ye que la calle ta mal segada”, si llueu pegues otru inda peor, “bono, un día malu tiénlu cualquiera”, si por enquivocación das un golpín apañáu, “bonísimo”, “vas muncho bien”, si se da’l casu de dar un d’esos que tú nin siquier sabes que ficíste pero’l guelpe ye bon de verdá entós la cosa dispárase, “vaya golpazu, chaval”, “tas fechu un profesional”. El día esi que nun das nin una, que los collacios escosen el repertoriu de bones pallabres, cuando váis camin del aparcamientu tirando del carru cola tiesta embaxo, siempres ta’l bon compañeru que te diz aquello de “nun t’amurnies ho, el golf ye asina, mañana va salite bien, yá lo verás”. Nunca ye culpa tuya y siempres atopes un puntu al que te garrar pa subite la moral. Nun fai falta gastar perres en coach ni en sicólogos; eso sí, en cuantu anicies a meyorar éntrente les ganes de quedar un ratín a charrar colos collacios sobro lo bien que lo ficiste y al final acabes gastando en sidra más que cola güertina.

Raúl Suevos

En Xixón, a 4 díes vencíos d’abril de 2023