Nun ye un pueblu, namái una parroquia a la salida d’Uviéu,
camín de Mieres. Unes cuantes cases metanes un paisaxe de praos, con un vieyu
palaciu y una ermita formosa dedicada a santo Tomas. Con mui bona xente, según
me cuenta’l mio amigu Urbano, que siempres la tien en boca, pero, más allá d’eso,
nunca supieramos d’ella sinon llega a ser porque’l rei Xuan Carlos otorgó-y el títulu de conde de Llatores al xefe de la so Casa real, el xeneral Sabín
Fernández Campos, cuando decidió despedilu. Un asturianu cabal y concienzudu
que, amás de les competencies inherentes al cargu, cumplía’l llabor de ser el
pepitu grillu del so egrexu señor, lo que lu caltenía, en ciertu grau, a salvu
de cayer nes típiques borbonaes que xalonaron la fin del so reináu. Y ye que,
dende los tiempos de Xulio Cesar, ye sabío que fai falta que daquien-y recuerde
a los purpuraos que son simples humanos. Ye lo qu’hai.
Ye, al paecer, dalgo connatural col poder, y nel casu del
palaciu de la Moncloa hasta se fala del síndrome que, enantes o dempués, acaba
por algamar a tolos sos inquilinos, y que tien como síntomas más evidentes l’alloñamientu
de la realidá del país, y, nos casos más agudos, una tendencia nidia al
descontrol na autoestima, como, paez ser, asocede-y al doctor Sánchez. Nun
tienen ellí a un conde de Llatores y a dalu pepitu grillu, cabría cabildar.
D’esta especie de sicopatía qu’algama a los presidentes
tuvimos ayeri cumplida esposición demientres el debate qu’enfrentó a los dos
principales aspirantes a ganar les eleiciones vinientes; y ye que pudimos
apreciar a un Sánchez que, aparentemente, muévese nun mundiu particular,
seguramente formáu a partir de los enxuagaos informes que-y pasen los sos bien
pagaos asesores, y les descripciones de los sos más allegaos colaboradores,
enfrascaos neso que llamen pensamientu collaborativu, y que consiste n’estar
rápidu y atentu p’aportar nos discutinios internos, de toa mena, el pensamientu
que s’intuye más averáu al del líder. Y asina-yos va.
Ayeri vimos a un aspirante, Feijoo, que namái tevo qu’adoptar
una posición reactiva a tolos intentos d’ataque del presidente n’exerciciu,
como si ésti escaeciera que ye él quien ocupa la presidencia. Daqué que namái s’esplica
dende’l ñerviosismu que provoquen unes encuestes desfavoratibles, y tamién, nun
cabe dulda, dende’l so narcisismu notoriu y la falsa creyencia de que lo d’ayeri
sedría como los debates encorsetaos qu’hasta’l momentu tuvieran nel Senao.
A ver cómo lo arregla.
Raúl Suevos
A 11 diés vencíos de xunetu de 2023
No comments:
Post a Comment