Vienme l’alcordanza de los mios díes infantiles de guaḥe, nos que’l domingu, tres la misa de doce, definíase’l momentu del vermú pa tou aquel que podía permitíselo; la mayoría pos yeren tiempos de casi plenu emplegu, y, amás, n’Asturies, ésti taba abondo bien pagao.
Nun había quiciabes tantes terraces y variedá de marques y posibilidaes como anguaño. Naquella dómina too se reducía a un vermú, posiblemente caseru, o un vasu de vinu, seique acompañáu d’unos calamares fritos pa que los neños picásemos daqué mientes los pas falaben. Yeren tiempos bonos.
Agora, en Xixón, anque pocos vayan a misa, tenemos gran cantidá de terraces pa escoyer, y gran surtíu de marques de vermú, cerveces o vinos para peñerar, anque los usos paez que foron camudando col tiempu; y asina, dáse’l casu que, pasaes les doce, lo que más s’aprecia nes terraces domingueres ye personal degustando un café con churros, o semeyante. Ye lo qu’hai.
Na zona de Begoña güeyo una casi silenciosa terraza, magar el plenu d’ocupación. Y ye que la xente paez cansada, casi desmayada, productu de la folixa del sábadu nueche, posiblemente. Aquella qu’inmortalizó John Travolta, pero estilu xixonés.
En redol d’una mesa redonda, un quintetu de fémines, más cuarentón que treintañeru, conxuntaes con unas camisetas rosa fucsia con un lletreru que nun algamo a descifrar, inclinense cachazues sobro les sos tazes, dexando dalgunes d’elles abandonaos nel platu los churros. Vese que’l cuerpu namái ta pa la cafeína.
Más allá, averaos pero ignorándose, un grupu mayor de mozos, cercanos igualmente a la cuarentena, tamién s’afana colos sos cafés, anque estos sí despachen los churros; vese que tán más entrenados, anque amás amuesense seles. Les sos maletes de finde, arrodien el esterior de la segunda de les meses, señalándomos a los pasiantes la so condición de turismu pasaxeru.
Mientes busco’l refuxu del Dindurra divago sobro la intención del gobiernu municipal nuevu de potenciar el turismu na ciudá, abandonando, aparentemente, la idea de fundar el futuru de Xixón en dalgo más substancial, más allá d’esti aspeutu del sector servicios que ye intensivo en mano d¡obra, mal pagada, pero que pocu puede dar de sí nuna ciudá que nun ye a sacar alantre un hotel de cinco estrelles.
Son varios los miles d’habitaciones turístiques censaes na villa, secando les posibilidaes del sector hoteleru, yá de por sí en pésima situación, pero la cortedá del nuesu branu, magar el cambéu climáticu, nun asegura una base económica pal conceyu, y menos a base de despediés de solteru.
Raúl Suevos
A 25 díes vencíos de xunu de 2023
Torna en castellán en repdiv.blogspot.com
No comments:
Post a Comment