El mar de los Sargazos

 

Nes noveles d’aventures antañones, aquelles de Xulio Verne y simeyantes, yera relativamente habitual atopase col mar de los Sargazos. Nes d’agora la cosa va d’intelixencies artificiales, les ñaturales son ca vegada más arrezquilaes, mundios estelares, o universos underground, pero lo xeográfico tá nidiamente demodé. Ye lo qu’hai.

Aquel mar sigue esistiendo, siempres tevo ehí, na parte más occidental del océanu Atlánticu, frente a les Bermudes, muncho enantes de que los sos pantalones se pusieran de moda. Yá lu enfrentó’l propiu Cristóbal Colón, y la so composición a base d’ocle flotante, y l’ausencia de vientos en tola so estensión, llevaron a munchos barcos nel pasáu a quedase avaraos nes sos augues. A vegaes demasiao, y según la pluma del novelista, pa tola eternidá.

Ye un mar improductivu, quitando pal desove de les anguiles, y visto’l volumen menguante d’angules que mos llega podría deducise que nesi aspeutu tamién tiende al nihilismu. Como’l nuesu sistema políticu según los resultaos de les aínda palpitantes eleiciones xenerales.

El resultáu del 23J déxamos nun mar de Sargazos auténticu, nun pantanu barométricu au nun se va mover un res demientres dellos meses. Una inacción que difícilmente puede ser productiva pa los intereses de la nación, precisamente cuando mos toca llevar la morra del Conseyu européu. N’un momentu que los intereses estratéxicos de bloques y países atopense metanes una cruciada que, posiblemente, marque les décades vinientes.

Ye difícil abarruntar una solución de gobiernu. Nin siquier un frankenstein 2, con tolo qu’eso diba suponer pa los fundamentales de la nación, paez facederu nesti momentu, con unes eleiciones nel País Vascu y Cataluña a la vuelta de la esquina, y los protagonistes independentistes de les dos rexones xugándose los cuartos nel envite, lo que va facer que’l compromisu col doctor Sánchez seya mui difícil nesta ocasión, casi un imposible, inclusive pa un escapista contrastáu como él.

De nuevo, ya asocedió col segundu gobiernu Rajoy, el Rei tien una papeleta a resolver en Zarzuela. Y una vegada más, analistes y ciudadanos van entrugase por qué nun se camuda la llei eleutoral pa torgar que, reiteradamente, los grandes partíos se vean estorsionaos por aquellos que quieren romper la nación española.

Una entruga pa la que nun van atopar respuesta nos programes eleutorales d’esos mesmos partíos, pos nada apunten sobro’l tema. Un solución pa la qu’esa Europa, a la que tanto s’apela notres oportunidaes, respuende col premiu de mayoría, como en Grecia; o col sistema mistu, n’Alemaña. Ellos sabrán.  

Raúl Suevos

A 24 díes vencíos de xunetu de 2023

Torna en castellán en repdiv.blogspot.com