Ayeri saltó la noticia del vixésimu aniversario del su
fallecimientu. Llevósela un cáncer con preavisu, lo que-y dio pa intentar tornar
a la so Cuba querida enantes de morrer. Pero nun hebo un res que facer, l’odiu
y la rancura que los Castro guarden a tolos que osaron refugar a la Revolución ye
de una duración ensin llende, a lo menos tanta como la llarga esistencia de
esos dos feroces xermanos.
Celia coló de Cuba en cuantu se dio cuenta de lo que
significaba l’autocracia castrista, y poro pasó a la llista de traidores; como’l
pianista Bebo Valdés, o como l’autor de los Tres tristes tigres, Guillermo
Cabrera Infante; o como tantos otros. Xente qu’amaben la llibertá y que poro
abandonaron la Islla bonita, la inmensa cárcel caribeña que rixe la familia
Castro dende va yá 64 años, cola connivencia de la esquierda caviar europea
demientres munchos años, anque agora namái la España de la Yoli y el doctor
Sánchez s’amuesen comprensivos con aquella depravación política y social. Ye lo
qu’hai.
Na Cuba anguaño pásase fame. Na islla de les tres coseches
nun hai forma de sacar alantre una agricultura decente; y l’apuesta pol turismu,
cola competencia en tol arcu caribeñu, nun da pa compensar el coste de les
grandes inversiones n’hoteles de cinco estrelles, pues el turista, quitando’l
sexual, nun quier salir a les cais d’una ciudá que nun tiempu foi la xoya d’América
y güei se caen a pedazos tres sesenta años ensin mantenimientu.
A Cuba sofitenla les remeses qu’únvien los cientos de miles
de cubanos que, d’una forma u otra, algamaron a dexar la patria de José Martí y
agora busquense la vida polos llugares más inopinados; como’l casu de dalgunos
d’ellos que foron reclutaos polos exércitos de Vladimir Putin.
N’España residen milenta. La llei de Memoria histórica, nes
sos dos versiones, habilitó la posibilidá d’alquirir la nacionalidá española a
munchos d’ellos, descendientes de españoles en mayor o menor grau. Ye la
conocida ellí como llei de ñetos, pente medies la cuala mos tien llegao un bon
númberu de brazos mozos, de los que tan escarsa anda la nación, que, si les coses-yos van bien, van acabar allugaos definitivamente n’España,
descapitalizando la islla ulteriormente.
Güei, anque viviera, Celia nun podría entrar en Cuba, l’ogru
de Santiago, anque nun tea en primer fila, sigue dirixendo los destinos de los
vieyos y afeutos al réxime qu’entá quede allá, anque n’Europa dalgunos nun se
quieran enterar.
Raúl Suevos
A 16 díes vencíos de xunetu de 2023
No comments:
Post a Comment