La purga del 37

 

L’añu 1937 foi abondosu en sucesos, particularmente nuna España que s’atopaba en plena Guerra incivil. N’Asturies diba significar el fin del Gobernín, el Conseyu soberanu d’Asturies y Lleón, asina nomáu por Manuel Azaña, y enantes d’eso, cola cayida de Xixón, desendolcóse la cruenta y heroica –polos dos bandos- batalla del Mazucu, nes cumes de la Sierra de Cuera. Pero dio muncho más de sí aquel añu.

Rusia yera la gran protagonista, ellí y equí. L’añu anterior entamaren los pernomaos “xuicios de Moscú” que diben señalar l’aniciu de la Gran purga, supuestamente p'acabar colos trotskistes, pero que se llevó per delantre a más d’un millón de persones, ente cuadros del partíu y familiares o allegaos. Tamién la mayor parte de los cuadros de mando del Exércitu “Rojo”, fundáu y dirixíu por Trotski, y, poro, baxo sospecha.

N’España, au los asesores rusos yeren lexón, namái se salvó'l xefe d’ellos, Orlov, miembru del NKVD, que, anciosu, tomó a tiempu la decisión de salir pitando pa llegar a Canadá y acabar años dempués viviendo pacetiblemente nos EEXX. El restu de cuadros destacaos nel país de nueso foron llamaos a Moscú, onde desapaecieron pa siempres.

Los mandos del Exércitu “Rojo” foron sustituyíos por oficiales nuevos, de escarsa preparación pero contrastada llealtá al líder, Stalin. Lo que diba servir pa que dos años dempués, nel 39, y tres entamar una guerra d’agresión escontra la so vecina Finlandia, con superioridá apolmonante –suena-vos-, fueran frenaos con grandes pérdides por unes fuercies mui inferiores en númberu y medios de combate, pero mui bien dirixíes. Lo mesmo diba asoceder en  1941 cola entrada de la Wehrmacht alemana en Rusia, namái esbaratada na so progresión poles decisiones babayes del so líder.

Otra vegada la historia paez querer repetise, según cuenten les cróniques non oficiales, y ye que l’almirador confesáu de Stalin, el señor Putin, dispondríase a llevar a cabu una purga ente, non los xenerales, que sedríen l’autentica menacia pero son poderosos, sinon escontra los cuadros medios, los xefes d’unidá tipu batallón, qu’aplaudieron, ensin reaccionar, l’avance de les tropes de Wagner.

El rei, al paecer, ta desnudu. A lo menos asina mos lo tien amosao’l fracasáu guelpe militar, y agora necesita proclamar lo contrario, d’ehí'l so bañu de públicu en Daguestán, pero tamién tien que purgar pa demostrar que caltien el poder. El so problema, como siempres asocedió coles purgues, ta n’axustar la dosis y la duración, pa nun acabar de destruyir l’enfermu, nesti casu’l so exércitu, y con ello al propiu réximen y el so poder.   

Raúl Suevos

A 30 díes vencíos de xunu de 2023

Torna en castellán en repdiv.blogspot.com