Asturies tien una gran tradición coles ñueces. Enantes,
cuando los pueblos taben poblaos, nun había casa que nun tuviera’l propiu, pa
consumu internu y venta del escedente. Lo mesmu asocedía na vecina Lugo y nel
restu de Galicia.
Col pasu del tiempu, n’entrambes rexones, los pueblos foron
vaciándose y los montes enllenándose d’“ocalitos”, qu’a lo cabero arden casi
cola mesma velocidá cola que lo facien los vieyos pinos llantaos pol ICONA.
Anguaño, col impulsu del interés económicu de los rendimientos
de la ñuez, paez que na rexón vecina esiste un fuerte interés haza’l plantíu d’esta
especie de les xuglandácees, que ye tan recomendada polos dietistes de toa mena
polos sos induldables efeutos positivos pa la salú.
Nel País Vascu tamién se daben les ñueces, a lo menos eso yera
lo que pregonaba Xavier Arzallus, aquel xesuita reconvertíu en políticu que
demientres dellos años dirixó los destinos del PNV, y, en ciertu mou, los d’España.
Yeren unes ñueces, al paecer, manchaes de sangre, de sangre española; unes ñueces
que cayíen del árbol sacudíu por ETA y que’l PNV recoyía. Manchaes de sangre.
Son histories de les que nun se fae ecu la prensa, por vieyes,
y que namái los que peñamos canes caltenemos na memoria. Los tiempos, siempres
camudantes y en constante evolución, faen que lo que fuera estalinismu pasara a
eurocomunismu, izquierda xunida más tarde, pa tres una lixera indignación dedicase
a sumar per tolos requexos. Pero la sangre sigue aínda llenta nel corazón de muncha
xente, particularmente nel de les víctimes. Y dalgunes manifestaciones rescuecen.
La esquierda vístese de progresismu pa asina convertir en
reaccionariu al restu, y hasta me paez lexítimu. Allá caún colos sos disfraces.
Pero unu debe escoyer con procuru les compañíes, más allá de les babayaes de
campaña eleutoral, especialmente si l’oxetivu a algamar ye’l gobiernu de la nación.
Particularmente si, percima del gobiernu de lo económico, se quier reconducir
la deriva ideolóxica de los años caberos. Si se quier.
Poro nun dexa de chocame que’l candidatu na morra de toles
encuestes se llance, nel so optimismu, a insinuar la so preferencia, non yá pol
señor Page, sinon pola tropa peneuvista, pa sofitar un posible gobiernu español
por él dirixíu, en desterciu de los votos del señor Abascal, convertíu güei por
toos nun asonsañamientu d’Araziel al que hai que condergar al Avernu más
fonderu.
Enantes de pañar les ñueces, ensangrentaes, el PNV yá tenía
traicionao a la República, y más recien al propiu Rajoy. Ándese con curiu señor
Feijoo.
Raúl Suevos
A 17 díes vencíos de xunetu de 2023
No comments:
Post a Comment