Güei la Bolsa española abre haza enriba, como un cohete; pero
non, nun ye’l so méritu, namái ye’l reflexu de la sesión de la Bolsa de
Shanghái qu’acaba de batir records de cinco años, no que nun dexa de ser una engarradiella
más de la guerra económica que yá lleva dellos años aniciada ente China y los
EEXX. Lo qu'entamó Richard Nixon, va yá munchos años, como una forma de
desequilibrar a la Xunión Soviética, pasó a ser más tarde un gran mercáu nuevu,
depués la gran fábrica –a precios de saldu- de cuasi tol mundu, y cuando se quisieron
dar cuenta teníen un tarrecible competidor delantre d’ellos.
China, u nació la pandemia, supo xestionar la situación
gracies a la mano de fierro de los gobiernos totalitarios pa imponer midies d’orden
y disciplina; y tamién pente medies l’usu de les sos reserves descomanaes de
divises y de delda ayena que-y sirvieron, y sirven, pa inyectar cantidaes
enormes d’osíxeno a la so economía. La
Bolsa, que pa lo bono y lo malo suel avanzar los cambeos, consciente de que van
salir en cabeza del mundu, güei reaccionó con un gran saltu haza alantre, pero
esta vegada más sólidu que’l que pretendió dar Mao Tse Tung.
China lleva dellos años avanzando sele y militarmente nel Mar de la
China, qu’anque nun ye de so ye vital controlalu p'asegurar les rutes
loxístiques qu’alimenten al xigante. Los EEXX, yá con Obama, desplazaron el so
poder naval haza Oriente, albidrando que ye ellí au van tener que demostrar que
siguen siendo’l guardián del Orden mundial. Pero too debería siguir siendo una
simple exhibición de músculos pues China sábese, o sabíase, incapaz pol momentu
de daqué más que sacar los dientes. ¿Siguimos ehí?
China son dos. La china Han, agrícola y marítima, onde se xenera,
dende va milenios, la bayura del país, y el gran cinturón d’estepes y montañes
xenerador de fame y d’invasiones haza’l corazón chinu. Anguaño toos ellos, Mongolia,
el Xinjiang, el Tíbet, ta baxo control de Pekín y la calidá de vida tien
meyorao enforma, anque’l pagu fuere la libertá. China ta a puntu de ser una, y eso
debería preocupar a los EEXX y al restu del mundu.
Lo que mos diz la Bolsa de Shanghái ye que, anque caiga la
demanda mundial, la demanda interna china y les sos reserves van ser a sacar
ilesu al país de la llerciosa crisis económica que se mos vien enriba a los
mortales, y los EEXX tán en plena campaña eleutoral con un presidente desnortáu
braciando ensin parar pa nun afondase. Bonos tiempos pa los estudiosos de la xeopolítica.
Raúl Suevos
A 6 díes vencíos de xunetu de 2020
No comments:
Post a Comment