Dictadorzuelos potenciales

El sistema de gobiernu democráticu básase na separación de los tres poderes del estáu, el llexislativu, au mora la soberanía, l’executivu o gobiernu y, finalmente, el xudicial, garante del imperiu de la Llei. Un sistema de frenos y equilibrios, los “checks and balances” a los que s’apela en tiempos d’afogones sistémicos. No son perfeutos y, n’ocasiones, atopamonos con gobernantes  que, de forma porcaz o más o menos tapada, busquen la forma d’esgastar a dos d’ellos guetando la supremacía del executivu. Ye una deriva autoritaria más frecuente de lo que pudiera paecer y, como siempres hai una personalidá autoritaria tres talos movimientos, esisten nicios que mos pueden sollertar sobro talos individuos.

La intelectualidá progresista del nuesu país, sentáu qu’esti calificativu úsase güei como mediu de descalificar a los adversarios políticos que pasaríen direutamente a ser fascistes, paez s’esmoreciera en rellación cola so supuesta misión de crítica al poder, lo que da ales a quienes lu ocupen p’adoptar actitues que suponen una erosión pernidia de los fundamentos del propiu sistema. El so silenciu fo clamorosu estos díes en que la prensa non allineada col poder fo atacada dende’l gobiernu.

Nos EEXX lleven años estudiando’l fenómenu del autoritarismu del que dalu país ta llibre; l’húngaru Orban, exemplar primer ministru nel so primer periodu de gobiernu, caltien anguaño una clara deriva autoritaria que, si la presión europea nun lo remedia, va acabar col so país nel llimbu de les democracies baxo vixilancia. Esos estudios definen cuatro indicadores que pueden sollertamos sobro la tendencia de dellos líderes haza la dictadura o, como poco, al apodrecimientu de la democracia.

Hai cuatro factores que mos pueden avisar de les tendencies encubiertes nun políticu: El refugu de las riegles de xuegu, que n’España vienen daes pola Constitución y los matices que la Transición ameció; reparen quién pon en cuestión talos principios. La negación de la lexitimidá del oponente; equí trataríase d’endemoniar, xeneralmente cola etiqueta de fascista que pa too sirve, a la oposición, especialmente a la que s’alluga nel estremu del espectru políticu, a esta podemos axudica-y ensin más el títulu de golpista. El siguiente elementu sedría l’usu o xustificación de la violencia escontra los adversarios, y equí tenemoslo fácil puesto que l’inventu del escrache tien patente. La alerta cabera sedría la proclividá pa ilegalizar oponentes o prensa, y d’esto también el nuesu homín y los sos devotos mos tienen dao amueses, especialmente nestos díes caberos.

Déxovos a vós que faigáis les vueses propies deducciones. Ye fácil.  

Raúl Suevos

A 9 díes vencíos de xunetu de 2020