Los locales d'ociu nocherniegu tienen ente los sos asalariaos
a unos personaxes, grandes como armarios y xeneralmente traxeaos d’oscuru que
cola so sola presencia, actitú amenazante o, llegáu’l casu, l’usu de la so descomanada
masa corporal, encarguense d’enzacar el pasu a quienes nun algamen el estándar
de prestancia personal que’l llocal esixe o, cenciellamente, entren-yos pol
güeyu esquierdu. Dientro d’estes importantes responsabilidaes tamién ta la
d’echar fuera del negociu a enfilaos, pesaos o alborotadores.
N’Italia, que la so cultura yá yera vieya cuando’l restu
d’europeos aniciaba a ser consciente de lo qu’eso significaba, tienen una
especial gracia pa dar nome a dalgunes de les modernes procesiones que van apaeciendo
nel nuesu escurrir d’urbanites. A los manteros ellí dicin-yos “vucumpra” porqu’eso,
precisamente, ¿vuoi cumprare?, ¿quies comprar? Ye la frase qu’usen pa entamar
esa peculiar rellación comercial. A los qu’echen fuera de les discoteques, buttare
fuori, echar fuera, dicin-yos eso, butafuori. Ye una llingua, la italiana,
práutica y cenciella.
Güei, paseando la playa por aquello que mi madre me dicía, que
los baños de mar son bonos pa la circulación anque sólo se mueyen les piernes,
tuve ocasión de ver un espectáculu insólitu. A la altura de la Escalerona, los
controladores d’aforu, uniformaos colos sos chalecos reflectantes y el so
“sereno” al llombu –supongo qu’heriedu municipal de dalguna previa operación
fallida- diben pidiendo al personal que, debío a la subida de la marea y el
consiguiente amontar de la densidá personal na zona, abandonaren el llugar.
L’aspeutu estraordinariu del acontecimientu ye que tol mundu
recoyía les sos pertenencias y mansamente colaba haza esa maraviella del art decó
xixones que representa la familiar Escalerona. Amezan lo anterior col usu
masivu de la mázcara, potenciáu en dellos casos pola presencia de la policía
municipal ensin dulda; l’escelente control que la Sanidá asturiana ta llevando
colos contaxos del covid que güei dan 17 contaxaos y setenta y tantos controlaos
rellacionaos colos anteriores, y vamos llegar a la conclusión de que quiciabes
somos una sociedá moderadamente responsable. Afortunadamente.
Tien Asturies énte sí la más terrible oportunidá de
posicionar la so marca nel mundu. Si logramos caltener a raya al virus, como
hasta agora, vase falar muncho y bien de la rexón, lo que ensin dulda vanos
aportar crecimientu turísticu n’años vinientes pero, muncho más importante, vanos
presentar énte’l mundu como un bon llugar pa invertir, pos los capitales busquen,
énte too, sociedaes formaes y responsables, lo que reflexamos anguaño. Nun lo
estropiemos.
Raúl Suevos
A 23 díes vencíos de xunetu de 2020
No comments:
Post a Comment