Eso del periodismu rosa ye cosa de los países del sur; debe
ser polo del catolicismu porque los países del norte, más protestantes ellos,
nun lo tienen. O quiciabes seya una cuestión de porteres, tamién asuntu más de
los países mediterráneos. El casu ye qu’equí, ente nós, tiénse convertío nuna
especialidá televisiva qu’algama les sos altures máximes, cuasi habría que
falar de paraxismu, na televisión del cavaliere, del italianu Berlusconi, que
ye l’amu de Telecinco. Ellí ye au campa y afara esi programa de nome Sálvame.
¿De qué?
Güei díme cuenta de que ye un fraude; y ello magar que tien
un gran elencu de periodistes ¿O son otra cosa? sentaos en redol del so
presentador estrella que los mueve o conmueve en función de les necesidaes de
l’audiencia del momentu. Güei trataben enforma la separación de un conocíu
toreru valencianu, mui bon toreru por cierto, y esforciabense n’afondar nun
supuestu y xeneralizáu escándalu tocantes ciertos renomaos futbolistes –de nome
reserváu- que, al paecer, organicen verbenes con fémines encantadores, de
llombu de les sos respeutives. ¡Qué barbaridá¡
Digo ¡Qué barbaridá¡ porque m’escandaliza qu’estos
especialistes nos asuntos del baxu vientre nun tean investigando a lo fondero
nel asuntu más chornizu, ramificáu, politizáu y feminista –del feminismu d’agora,
non del de Lidia Falcón- qu’ocupa anguaño les páxines de la prensa normal, la
de siempres, vamos, esa que yá cuasi naide llee. Toi refiriéndome a la tarxeta
de móvil qu’investiga el xuez García Castellón na Audiencia Nacional, puru
asuntu de prensa rosa.
Tenemos una tarxeta de móvil robada a una moza activista y
política que, nel tiempu, progresaba rápidamente nel partíu políticu creáu por
quien güei ye vicepresidente del gobiernu d’España; el cualu acababa de cortar la
so relación con una conocida política comunista que-y viniera mui bien pa la so
inicial progresión nel procelosu mundu de la política real; too esto asocedía enantes
de que’l prometedor líder s’empareyase con otra moza de la so formación, que
depués faría perrápida carriera hasta aportar anguaño a la cartera ministerial.
Too ello de manera natural, supuestamente.
L’asuntu de la tarxeta sirvió, tres la conveniente denuncia,
pa ser la exa de la campaña eleutoral del líder alfa quien, al paecer, sentíase
victima de les cloaques del estáu. El casu ye que la xusticia anició la so
andadura, lenta siempres n’España pero con pasu inexorable y, per esi camín, entamaron
a salir más cuentos de portera. Qué coses.
La abogada de la dueña de la tarxeta, supuestamente, garraba
cachu con un fiscal de la Audiencia que, tamién supuestamente, contaba-y coses
que nun debía contar. El abogáu del partíu encargáu de velar pola llegalidá de
los sos asuntos avisó del peligru de talos contubernios pero, como pagu polos
sos desvelos, fo espulsáu de la organización porque, tamién supuestamente, el
secretariu d’esa rama, intentaba garrar cachu cola inquieta abogada, que supuestamente
debe ser mui curiosa.
Convendrán conmigo qu’equí hai cachu y muncho más pa que los
del Sálvame entraren a sacu, quiciabes buscando un Ondas; pero non, ellos
siguen, erre qu’erre, detrás de los futbolistas fiesteros. Qué coses.
Raúl Suevos
A 1 día vencíu de xunetu de 2020
Versión en castellán en repdiv.blogspot.com
No comments:
Post a Comment