La guayabera de So Maxestá

Esta mañana los Reis d’España, dientro d’esa discreta, continua y aportunante batalla que’l Rei Felipe lleva a cabu pa torgar que l’insanu ambiente políticu nacional lu arrinque de los corazones de los españoles del común, visitaron Sevilla, específicamente’l barriu de les 3000 viviendes; un barriu que la mayoría conocemos por noticies estremaes –siempres de calter negativu- que los medios de comunicación social mos averen con cierta frecuencia.

Llamóme descomanadamente l’atención el paxellu de S.M., una guayabera de llinu azul cielu que dalgún asesor debió aconseya-y con mui bon gustu y sentíu común, pos ye una prenda estraordinariamente apropiada pa la ocasión. Esta mañana en Sevilla caíen unos 36 graos a la sombra, con un airiquín sele que, subiendo pol Guadalquivir, debía dar una sensación de churnu y humedá. Pero al Rei nun-ylo contaron too.

Yo descubrí la guayabera va yá unos años, en Cuba. Les mio obligaciones imponíenme actos estremaos con traxe y corbata lo que podía convertise nun supliciu. Na contraparte cubana atopábame con una especie de camisa de llevar per fuera que, de entrada, provocabame  envidia. Al poco d’aportar, el gobiernu cubanu declaró la guayabera como prenda obligada de protocolu; bastaba con pone-y puñu doble y, nel so casu, acompañala con unos xemelos afayadizos, ellí yugos.

En cuanto pude fíceme confeccionar una guayabera, esperando con ello algamar el paraísu tropical, pero los anicios foron decepcionantes. La sensación de les gotes de sudor corriendo pel llombu metanes un discursu o una simple conversación, amás d'incomodar, incapaciten pa prestar l’atención debida a lo que tás faciendo. Ye un pequeñu tormentu que los islleños paecíen tener superao.

Un amigu habaneru confióme’l secretu de la felicidá. Una simple camiseta de tirantes, meyor de filo que d’algodón; ella encargase d’enxugar esa posible formación de sudor y de torgar qu’eses gotes malines entamen una competición a ver cuala d’elles ye la primer en llegar a la cintura del to pantalón. Esi día descubrí’l placer de la mundanidá habanera y encargué dos guayaberes nueves, una d’elles de protocolu.

N’Aranxuez, un año depués y aprovechando de la mio vecindá oficial habanera, participé nun actu nel que los varones taben obligaos al traxe oscuru o l’uniforme, y ellí me presenté cola mio guayabera de protocolu, blanca, de llinu, con botones de nácar y fachendosos xemelos del mesmu material. Podía güeyar la gulisma y les ganes d’asesiname en dalgunos de los compañeros d’armes con los qu’ellí me realcontré, lo que me facía esfrutar doblemente de la guayabera de mio.

Daquien debería dici-y al Rei que se ponga una camiseta de tirantes baxo la so guayabera.

Raúl Suevos

A 29 díes vencíos de xunu de 2020

 Torna en castellán en repdiv.blogspot.com