Alló pel lloxanu 1991, l’entoncenes ministru d’Esteriores belga, señor Eyskens, despachóse con una frase, anguaño célebre, pa definir lo que yera la Xunión Europea de la dómina, “Un xigante económicu, un nanu políticu, y un vierme militar”, y güei, pasaos treinta y cinco años, podemos reparar que, nel fondu, la situación, lloñe de meyorar, tien empiorao ostensiblemente.
No económico, por más que los dirxentes europeos, tamién los nacionales como’l nuesu doctor Sánchez, mos enllenen la tiesta de macrodatos, como esi PIB maraviosu, que nin n’Europa nin n’España algama a despintar la realidá d’una vida con más probetería pa la ciudadanía, lo cierto ye qu’Europa, nun alcanza a tuteyar a los sos dos grandes competidores, la China de Xi Jinping y los EEXX de Trump, como la baxada de falda recien de la señora Von der Leyen n’Escocia mos amosó con clarencia, aceutando unos términos impuestos pol ogru anaranxáu, qu’aparte de lesivos nin siquier aporten la certidume de durabilidá. Y ensin saber cómo imponer regles aceutables a la importación masiva de productos chinos qu’acaben col texíu comercial européu ¿Xigante económicu?
No militar tocamos a arrebatu, y toos mos tenemos puesto a correr tres el toque de corneta de Trump, poniendo n’evidencia que nada se tien fecho tres la so aparatosa y menaciante primer presidencia, y tampocu dempués de que’l nuevu Stalin rusu invadiera, tres la so primer andanada nel 2014, l’Ucrania enterea va tres años. Too tien sío, de la mano del dubitativu Biden, un cobarde meter namái la puntina, ensin llegar nunca al final deseáu, la construcción d’una defensa europea real y creyíble, nel formatu que seya. Agora, too son prieses y proyeutos armamentísticos con fondos europeos, qu’en munchos casos nun van ser conducentes pero van enriquecer a dalgunos. Gusanu militar.
No político ye onde’l día 15 viniente, n’Alaska, col axuntamientu ente los autócratas rusu y yanqui, va vese les probes costures del vierme européu. Una reunión na que, dicen, Trump va entregar el botín al malváu de la película de terror, como yá ficiera nel so pacto aciagu colos talibanes afganos, y la sacrificada xente ucraniana va ser abandonada inmisericordemente a la so suerte, ensin dala penalidá pal invasor ¡Viva la Carta de Naciones Xuníes¡ y viva tamién esi nanu políticu que ye la Xunión Europea.
Tien que reaccionar Europa. Como Fuenteovexuna, toos a una. De lo contrario, esi asertu del señor Eykens non yá se va convertir nuna realidá sinon que va ganar velocidá, y en breve vamos asistir al cayente rápidu, mayor del actual, d’esa Xunión na que tantos creyímos demientres tantos años, y na que la España de Sánchez, tien decidío unilateralmente quedar fuera. Ye lo qu’hai.
Raúl Suevos
No comments:
Post a Comment