El 5 d’agostu, pa la muyer y pa mín, representa un finxu vital común qu’intentamos festeyar tolos años, anque non siempres, por razones estremaes, lo consiguimos. A la fin, col pasu de los años, l’actividá, por repetitiva en cuantu a los llugares, o meyor cabría dicir, en cuantu al restaurante, tien dío convirtiéndose en casi un ritu matrimonial.
La fecha, a la entrada de la Semanona, y en plena quincena grande, o lo que los italianos llamen ferragostu, nun ye’l meyor momentu pa esperar recibir un servicio estraordinariu, pero como ye’l calendariu el que mos impón l’eventu, nós llevamos munchos años repitiendo, y ello dámos una base abondo bona pa ver la evolución que la propia ciudá, la so xente, y los sos negocios tienen dío sofriendo.
Yo tomé los mios vinos primeros naquella Perla del Cantábricu, que xunto cola Taberna gallega de Carril, práuticamente completaben la totalidá de lo qu’agora ye una ruta de vinos descomanada, ruidosa, y per momentos agobiante. Tamién, amás de les mases de personal que nella pululen, los precios tienen dío subiendo, diría yo que ampliamente penrriba del índiz de precios, pero como l’alterne mos puede, y visto l’ésitu de la fórmula, cabe afirmar ensin temor a equivocase que playos y visitantes sofiten la moción. Ayeri a les nueve la nueche nun se podía caminar.
Pa la cena, repetimos dende va yá dellos años, magar al cambéu de propiedá y ampliadura del nome, la casa que se supón traxo la ventresca al nuesu Xixón del alma, nel barriu altu; y podemos afirmar que nun tien perdío clientela nestos años, al contrariu, anguaño ye impensable, supongo que como en casi tol centru, pretender asientu ensin cuntar con una reserva previa, y este ésitu continuáu tien un preciu a pagar pal cliente.
Ayeri los tiempos facíenmos ver que faltaba un camareru, y puede qu’en cocina tamién hubiera a lo menos un pinche descontáu si tenemos en cuenta que tantu les zamburiñes como la mítica ventresca retirarense del fuéu los suficientes segundos enantes como pa que nun tuvieran abondo feches, y el tradicional pistu qu’antaño acompañaba al platu güei va a parte na carta. A ello cabría añeder que, si bien los precios subieron mui moderadamente nos cinco años caberos, la ventresca d’ayeri namái yera la metá de la d’entoncenes, dalgo qu’a mín, por aquello de la edá, me convien, pero que nun creyo qu’a un paisanu en plenu vigor-y produza’l mesmu sentimientu. Ye lo qu’hai.
Queda aínda’l paséu gastru de la Semanona. Falaremos dempués.
Raúl Suevos
A 6 díes vencíos d’agostu de 2025
Torna en castellán en repdiv.blogspot.com
No comments:
Post a Comment