La yerba del Tragamón

 

Nun tenía la mañana un res de particular, más alló del fechu de que media España ta quemando y nós, n’Asturies, reviciamos dende va yá dellos díes d’un cielu encapotáu gracies al fluxu costante d’humedá que mos trae la brisa sele del norte dende’l Cantábricu. Ye un efeutu meteorolóxicu del que non esfruten los nuesos vecinos, que nun cuenten con esi muru calcáreu que formen los Picos d’Europa, colos sos altores de 2500 metros, que faen que cuando vienen vientos de sur y baxen recalentaos haza les Provincies Vascongaes, llevando a Bilbao a alganar hasta 40 grados, nosotros sigamos gozando del nuesu clima atlánticu. Y al revés, cuando’l fluxu vien del norte, como estos díes, la humedá retenía por esi mesmu muru, acaba condensando y formando nubes que, como esta pasada madrugada en Xixón, lleguen a descargar una lluvia fina, ente orvallu y orpín, qu’algama pa dar un respiru a los praos, yá na so mayoría agostaos.

Nel Tragamón, llugar d’aquel vieyu molín amachumbráu ente’l Campus y el Xardín Botánicu, y anguaño see d’un coquetu campu de golf municipal, llevábemos díes preocupaos güeyando como la yerba de les cais, ensin riegu artificial, diben amariando primero pa dempués garrar un tonu terrosu, con una yerba apelmazada que paecía pidir misericordia a los xugadores, a la espera d’un par de díes pasaos por augua. Y esta mañana, tres la poca lluvia cayía mientes la nueche, asistimos a un fenómenu que, por ñatural, nun tien dexao de paecemos prodixosu; y ye que, magar que’l cielu siguía cubiertu por esa capa de nubes baxes, que nun dexaba pasar el sol, y a ratos orpinaba, ensin que la función clorofílica de la yerba desarrollara’l so trabayu permitiendo verdear a la planta, ésta retrucaba casi con ímpetu, presentándose arguta y puxante, convirtiendo les cais n’alfombres yerbose perfeutes que namái recordaban l’ayeri pola color amarronao qu’aínda amosaben.

Demientres, nel Suroccidente asturianu, en Galicia, Lleón, y otres contraes d’España, siguen les quemes, y el personal entrúgase, como casi tolos branos, por qué asoceden estes coses, ensin querer ver que la combinación del abandonu de los pueblos, colos sos vieyos usos económicos de calter agrariu, como amuesen los montes comunales de Soria o Navarra, y la presión a los que queden de les mal enfocaes lleis de protección de la natura, emburriaes en munchos casos por urbanites ensin conocimientu de la realidá de la naturaleza, tán nel orixe d’esos fuegos qu’afaren los territorios de nueso. Ye lo qu’hai.

Mientes, esi malapenes mediu llitru per metru cuadráu, cayíu la nueche pasada, da-y un respiru a les cais del Tragamón. Hasta que llueva de verdá.

Raúl Suevos

A 14 díes vencíos d’agostu de 2025

Torna en castellán en repdiv.blogspot.com