Centenariu en L'Habana

 

L’añu viniente vase cumplir el centenariu de la nacencia d’aquella bestia parda de nome Fidel, y d’apellíu Castro, pa vergoña de cualquier gallegu con un pocoñín de sentíu común. Un tipu qu’algamó engañar y arrastrar tres d’él a un grupu d’universitarios esaltaos, nuna universidá a la tiesta de los movimientos radicales d’esquierda na Hispanoamérica d’entoncenes, década de los 50 del sieglu pasáu, pa dempués tirase al terrorismu, col asaltu al cuartel de Moncada, 1953, sobrevivir, él y el hermanu Raúl, pa lluéu ser amnistiaos, al estilu de lo que más tarde pasaría con Chávez en Venezuela, y gracies a la influyencia familiar y la ilesia católica, pa, posteriormente, organizar un grupu en México col que desembarcaron y se tiraron al monte. Ellí, en condiciones normales, deberíen tener desapaecío por inanición, pero, los erros del exércitu de Batista, y el sofitu de la opinión pública yanqui, afalada por un periodista faltosu del New York Times que nun s’enteraba d’un res, dieron-yos combustible abondo como pa facer cayer la dictadura del sarxentu Fulgencio. Ye lo qu’hai.

Dempués siguieron décades de dictadura revolucionaria, igual de sanguinaria pero muncho más famélica que les de dreches, y nello siguen los cubanos anguaño, cuando tán a puntu d’entrar nel centenariu d’aquel barbudu qu’algamó a amarutar el so fascismu caribeñu como marsismu isleñu, y pal que’l so hermanu, añoso¡u nuna familia d’alta lonxevidá, prepara los fastos que distraigan de la probitería cotidiana na que sobreviven los cubanos que nun algamaron a colar de la islla, y que más qu’esposiciones alegóriques, preferiríen un platu de Ropa vieya los domingos. Namái eso.

Casi de la mesma quinta ye l’edificiu que Manuel del Busto, con tanta obra en Xixón, realizó en L’Habana pal Centru Asturianu en 1927. Una obra espectacular, magar que’l recorte presupuestario dexara les sos torres truncaes, pero con un salón de baile xigantescu, afrescáu nel so techu con motivos asturianos güei perdíos, y una escalera central prodixosa, rematada con un techu acristaláu nel que les Carabeles de Colón recuerden la historia isleña. Un edificio qu’anguaño aguanta les embestíes del tiempu gracias a la restauración que’l Principáu de Tinín Areces pagó nel so tiempu, y qu’anguaño acueye’l Muséu nacional de pintura, nutríu coles obres requisaes ensin compensación polos barbudos tres la llegada al poder.

Nun tán los cubanos pa centenarios. Namái quieren sobrevivir, y, mientes persista’l réxime autoxenocida de los Castro, paeciera que camareros y xineteres seya l’únicu porvenir que tienen.

Raúl Suevos

A 16 díes vencíos d’agostu de 2025